“YouTube” tərtibatçıları test rejimində izləyicilər və məzmun yaradıcıları arasında qarşılıqlı əlaqəni təkmilləşdirməyə yönəlmiş bir sıra yeni funksiyaların istifadəyə verildiyini elan ediblər.
Bu barədə “Google”un dəstək saytında mesaj dərc olunub.
Yeniliklər arasında hazırda məhdud sayda ingilisdilli istifadəçi üçün əlçatan olan canlı yayımlar üçün süni intellekt xülasəsi mövcuddur. Bu funksiya çatda mesajları təhlil edir və əsas məqamları vurğulayır ki, bu da xüsusilə aktiv çatı olan yayımlar üçün faydalıdır.
Bəzi “Android” smartfon sahibləri artıq “Google Lens” proqramında “YouTube” videolarındakı təsvirlər əsasında axtarış verə bilərlər.
Bloqerlər üçün iki yeni funksiya təqdim edilib. Bu funksiyalara kanal üçün QR-kod yaratmaq, mobil cihazlardan abunə olmağı asanlaşdırmaq və “Shorts” videoları yaratmaq üçün bir sıra effektlər dəsti aiddir. Hələlik yeni effektlər yalnız seçilmiş məzmun yaradıcıları üçün əlçatandır, lakin “YouTube” bu il ərzində onu bütün istifadəçilər üçün əlçatan etməyi planlaşdırır.