Tel-Əvivdəki Ben-Qurion hava limanının rəhbərliyi, beynəlxalq uçuşların əhəmiyyətli dərəcədə azalması səbəbindən hava limanının 1-ci terminalının bağlandığını elan edib.
Qafqaz Times -ın “Haaretz” qəzetinə istinadla verdiyi məlumata görə, Tel-Əvivdəki Ben-Qurion beynəlxalq hava limanının 1-ci terminalı xarici aviaşirkətlərin uçuşlarının tamamilə dayandırılması səbəbindən bağlanıb. Bu addım artan təhlükəsizlik narahatlıqları və terminaldan istifadə edən aviauçuşların nəzərəçarpacaq dərəcədə azalması fonunda atılıb.
Hesabata görə, 4 may tarixində yəmənli qüvvələrin bu hava limanı ətrafına raket hücumu, raketlərdən birinin hava limanı obyektlərinin yaxınlığında düşməsi, beynəlxalq uçuşların dayandırılmasının əsas səbəbi olub. Bu hücum nəticəsində bir neçə nəfər yaralanıb və hava limanının fəaliyyəti bir neçə gün pozulub.
Bu hücumun ardınca bəzi xarici aviaşirkətlər işğal olunmuş Fələstinə uçuşlarını dayandırıblar və müvəqqəti yenidən açılışa baxmayaraq, bu şirkətlərin böyük bir hissəsi Ben-Qurion hava limanı ilə əməkdaşlığı kəsmək qərarına gəlib. Bu məsələ 1-ci terminaldan beynəlxalq uçuşların kəskin azalmasına və nəhayət, bu terminalın tam bağlanmasına səbəb olub.
Qəzetin yazdığına görə, EasyJet, Ryanair və Wizz Air aviaşirkətləri yay fəslinin sonuna qədər İsrailə uçuşlarını bərpa etməyəcəklər.
Hava limanının rəhbərliyi bildirib ki, bütün beynəlxalq uçuşlar müvəqqəti olaraq 3-cü terminala köçürülüb və 1-ci terminalın fəaliyyətinin bərpası üçün hələ dəqiq tarix açıqlanmayıb. Hava limanı rəsmiləri vurğulayıblar ki, bu terminalın yenidən açılması təhlükəsizlik vəziyyətinin yaxşılaşmasından və aviaşirkətlərin təhlükələrin azalmasına əmin olmasından asılı olacaq.