Suriyanın cənubunda yerləşən Süveyda əyalətində baş verən silahlı qarşıdurmaların ikinci günündə ölən və yaralananların sayı 130 nəfərə çatıb.
Qafqaz Times-ın məlumata görə, Culani hökumətinin Daxili İşlər Nazirliyi bildirib ki, ölkənin cənubundakı Süveyda əyalətində baş verən silahlı toqquşmalarda azı 30 nəfər ölüb, 100 nəfər isə yaralanıb.
Suriya mənbələrinin verdiyi xəbərə görə, bu qarşıdurmalar Culaniyə bağlı silahlı ünsürlərlə əyalətdəki yerli druz (dürüzi) qruplar arasında baş verib.
Buna baxmayaraq, Culani hökumətinə yaxın media orqanları bu qarşıdurmaları silahlı qruplarla yerli qüvvələr arasında baş verən adi qarşıdurmalar kimi təqdim etməyə çalışır.
Suriya yerli mənbələrinin bildirdiyinə görə, gərginliyin və toqquşmaların azaldılması məqsədilə Süveyda əyalətində culani tərəfdarları ilə yerli druz qüvvələri arasında baş vermiş qarşıdurmalarda saxlanılan bütün şəxslər yerli tayfalar və qruplar tərəfindən azad edilib.
Mənbələr qeyd edirlər ki, saxlanılanların azad olunması “Şeyx əl-Əql” Yusif Cərbu və druz şeyxləri ilə tayfa liderlərinin vasitəçiliyi və əməkdaşlığı ilə mümkün olub.
Süveyda əyaləti ikinci gündür ki, druz qrupları ilə Culani hökumətinə bağlı silahlı ünsürlər arasında toqquşmalara səhnə olub. Dünən Suriya mənbələri bildirmişdi ki, Şərqi Süveydada druz qrupları Culani hökumətinə bağlı silahlıların hücumunu dəf edib və nəticədə Culani tərəfdarlarından bir neçəsi öldürülüb və ya yaralanıb.
Suriya mənbələrinin əlavə etdiyinə görə, Culani hökumətinə bağlı silahlı dəstələr druz qrupları ilə Süveydada baş verən qarşıdurmalardan sonra əyalətdə hərbi rejim elan edib və ümumi komendant saatı tətbiq olunub.