Sionist rejim ordusundakı hərbi qüvvə çatışmazlığı səbəbindən elit qüvvələrin bir hissəsi, mürəkkəb əməliyyatlarda iştirak etməli olduqları halda, Qəzzada patrul xidmətində piyada əsgər kimi istifadə olunurlar.
Qafqaz Times-ın məlumatına görə, sionist rejimin 12-ci kanalı xəbər verir ki, İsrail ordusundakı qüvvə çatışmazlığı, elit komando birləşmələrinin Qəzzada piyada kimi yerləşdirilməsinə səbəb olub.
İsrail ordusunda piyada əsgərlərin çatışmazlığı aylarla davam edən müharibədən sonra o qədər ciddi hal alıb ki, ordu bu məsələni, ciddi siyasi nəticələrinə baxmayaraq, Netanyahunun radikal koalisiyasının əsas tərəfdarlarından olan ultra-ortodoks (haredi) yəhudilərin hərbi xidmətə cəlb olunması üçün hüquqi məcburiyyət yaratmaqla həll etməyə çalışır.
Qəzzada 2025-ci ilin martında müharibənin yenidən alovlanmasından bu yana davam edən və sionist ordusunun ağır itkilər verdiyi bu uzunmüddətli savaş, adi və ehtiyat hərbçilərin narazılığına səbəb olub. Maariv qəzetinin yazdığına görə, İsrail ordusunun əsgərləri Baş nazir Benyamin Netanyahunun müharibə siyasətindən ciddi narazıdırlar və bu siyasətin yaxın gələcəkdə ordunun dağılması ilə nəticələnə biləcəyindən narahatdırlar.
Sionist rejimin ordusu ən azı 12 min nəfər hərbi qüvvə çatışmazlığı ilə üz-üzədir. Eyni zamanda, bəzi ehtiyat qüvvələr son 20 ayda beş dəfə müxtəlif cəbhələrə çağırılıb ki, bu da İsrailin hərbi tarixində görünməmiş bir haldır.
Bununla yanaşı, Yedioth Ahronoth qəzetinin internet saytı yazır ki, 2023-cü il 7 oktyabrdan bu yana ən azı 10 min sionist hərbçi ölüb və ya yaralanıb.
Bundan başqa, yalnız qüvvə çatışmazlığı deyil, sionist rejimin piyada qüvvələrinin zəifliyi də vəziyyəti daha da ağırlaşdırır. Belə ki, son iki həftə ərzində fələstinli mücahidlər Qəzzada ard-arda təşkil edilən pusqularla İsrail ordusuna ağır itkilər veriblər.