Bəzi amerikalı və ivritdilli media orqanları Qəzzədə atəşkəs üçün yeni təklifin detalları barədə məlumat yayaraq bildirib ki, bu 60 günlük atəşkəs dövründə israilli əsirlər müqabilində bir sıra fələstinli əsirlər azad olunacaq, lakin müharibənin başa çatmasına dair heç bir zəmanət verilməyib və danışıqlar davam edəcək.
Qafqaz Times -ın məlumatına görə, ABŞ prezidenti Donald Tramp çərşənbə axşamı axşamı Qəzzədə atəşkəsin yaxın vaxtlarda əldə olunacağı iddiasını təkrar edib və bildirib ki, İsrail 60 günlük atəşkəs təklifini yekunlaşdırmaq üzrədir, bəzi ivrit və amerikalı media isə bu təklifin detalları barədə məlumat yayıb.
Müharibənin dayandırılması və sionistlərin Qəzzədən geri çəkilməsi ilə bağlı qeyri-müəyyənlik
Bu mövzuda sionist rejimin 10-cu televiziya kanalı adlarını açıqlamayan iki diplomatın məlumatına istinadən xəbər verib ki, bu razılaşma çərçivəsində ilk gündə 8 sağ israilli əsir, 50-ci gündə isə daha 2 sağ əsir azad olunacaq, 18 ölü israilli əsirin cəsədi isə üç mərhələdə təhvil veriləcək.
Bu sionist media bildirib ki, atəşkəs üçün yeni təklifə görə İsrail ordusu Qəzza zolağının cənubundakı Murak oxundan geri çəkiləcək və Qəzzaya humanitar yardımların həcmi artırılacaq. Atəşkəs danışıqları ilə bağlı məlumatlı mənbələr razılaşmaya nail olmaqda ciddi irəliləyiş olduğunu bildiriblər, lakin müharibənin dayandırılması şərtləri və İsrailin hərbi geri çəkilməsinin miqyası ilə bağlı hələ də fikir ayrılıqları mövcuddur.
Eyni mövzu ilə bağlı CNN telekanalı da xəbər verib ki, Qətər rəsmiləri çərşənbə axşamı HƏMAS və İsrailə 60 günlük atəşkəs üçün yeni təklif təqdim ediblər və məlumatlı mənbənin sözlərinə görə, bu təklif Tramp administrasiyasının dəstəyi ilə irəli sürülüb. Mənbə bildirib ki, bu təklif aylarla aparılan pərdəarxası danışıqlardan sonra Trampın region üzrə xüsusi elçisi Stiv Vitkafın rəhbərliyi ilə yekunlaşdırılıb və elə həmin gün, İsrailin Strateji məsələlər naziri Ran Dermer Tramp administrasiyasının yüksək vəzifəli rəsmiləri ilə görüşmək üçün Vaşinqtona səfər etdiyi vaxt təqdim olunub.
Lakin bir sionist mənbə bu məsələ ilə bağlı bildirib ki, İsrail əvvəlki danışıqlarda da mübahisə predmeti olmuş əsas məqamlar – müharibənin dayandırılması üçün cədvəl və zəmanətlər ətrafında irəli sürülən yeni təkliflərin bir neçə maddəsini qəbul etməyib.
Həmin mənbə təklifdə yenilənmiş maddələrin təfərrüatlarını açıqlamayıb və bildirib ki, İsrailin baş naziri Benyamin Netanyahu Trampla görüşdən sonra Qəzzə atəşkəs danışıqlarında iştirak etmək üçün nümayəndə heyəti göndərə bilər.
HƏMAS və sionist rejimin atəşkəs üçün yeni təklifə mövqeyi
CNN-in başqa bir mənbəyə istinadən verdiyi məlumata görə, qətərlilərin üzərində işlədiyi atəşkəs təklifinin yeni versiyası HƏMAS-ın əvvəlki təkliflə bağlı narahatlıqlarını aradan qaldırmağa yönəlib. Yeni təklifə əsasən, israilli əsirlərin müqabilində bir sıra fələstinli əsirlər azad olunacaq.
Amerikanın Axios saytı da yüksək rütbəli sionist rəsmiyə istinadla bildirib ki, Vitkof və Dermer çərşənbə axşamı Ağ Evdə keçirdikləri görüşdə Qətərin təkmilləşdirilmiş atəşkəs və əsir mübadiləsi təklifini müzakirə ediblər. Ron Dermer Vitkofu İsrailin bu təklifə razı olduğu və HƏMAS-la razılaşmanı tamamlamaq üçün dolayı danışıqlara başlamağa hazır olduğu barədə məlumatlandırıb.
Eyni mövzuda ivritdilli Ynet saytı da dünən HƏMAS-a yaxın mənbələrə istinadən xəbər verib ki, bu hərəkatın liderləri atəşkəs layihəsini nəzərdən keçirirlər və vasitəçilər tərəfindən təqdim olunmuş yenilənmiş təkliflə bağlı məsləhətləşmələr aparılır.
Bu ivrit saytı vurğulayıb ki, HƏMAS liderləri intensiv və uzun iclaslar keçirirlər və qiymətləndirmələr bu hərəkatın atəşkəs təklifini qəbul edəcəyini göstərir; amma şərt odur ki, təklifin müddəaları daimi atəşkəs öhdəliyini əhatə etsin, təkcə müvəqqəti atəşkəslə məhdudlaşmasın. Ümumilikdə ehtiyatlı bir atmosfer hökm sürür və bu, son şans ola bilər.
Digər tərəfdən, bir sionist rəsmisi Trampın İsrailin Qəzzədə 60 günlük atəşkəsə razı olması ilə bağlı açıqlamasına toxunaraq Bloomberg agentliyinə deyib: Trampın İsrail və HƏMAS üzərində təzyiqi xüsusi təsir göstərir və Qətər və Misir HƏMAS-a izah edəcəklər ki, atəşkəs dövründə aparılan danışıqlar müharibənin dayandırılmasına doğru aparılacaq. Gözlənilir ki, İsrail gələn həftə Qəzzə atəşkəsi ilə bağlı danışıqlar üçün nümayəndə heyətini Qahirə və Dohaya göndərəcək.
Amerikalı və ivritdilli media orqanlarının məlumatına görə, Tramp ümidvar olduğunu bildirib ki, HƏMAS bu təklifi qəbul edəcək və qətərli və misirli vasitəçilər müharibəni dayandırmaq üçün son təklifi təqdim edəcəklər.
Sionistlərin Qəzzəyə hücumları genişləndirmə hədəsi
Amerikalı Axios saytının xəbərinə görə, bu razılaşmanın layihəsində vurğulanır ki, İsrail və HƏMAS 60 günlük atəşkəsdən müharibənin daimi olaraq başa çatdırılması və müharibədən sonra Qəzzənin idarə olunması üçün yol xəritəsinin hazırlanması ilə bağlı danışıqlar aparmaq üçün istifadə etməlidirlər. İsrail rəsmiləri xəbərdarlıq ediblər ki, atəşkəs və əsir mübadiləsi danışıqlarında tezliklə irəliləyiş əldə olunmasa, bu rejimin ordusu Qəzzədə əməliyyatlarını gücləndirəcək.
Bir sionist rəsmisi Axios saytına bu barədə deyib: “Biz Qəzzə şəhəri və mərkəzi bölgələrdəki qaçqın düşərgələri ilə Rəfahda etdiyimizin eynisini edəcəyik, yəni hər şeyi külə döndərəcəyik və əgər əsir mübadiləsi razılaşmasında irəliləyiş olmasa, başqa çıxış yolumuz olmayacaq.”
Qəzzədə atəşkəs üçün yeni təklifin ifşa olunmuş detalları
Əl-Arabi əl-Cədid və bir neçə media mənbəsindən sızdırılmış məlumatlara əsasən, Qəzzədə yeni atəşkəs təklifinin əsas müddəaları və ona nail olunması mərhələləri belədir:
– Bu razılaşma Qətərin əvvəlki təklifi hazırlamasından sonra təqdim edilib və Tramp tərəfindən təsdiqlənib.
– Bu razılaşma aylarla pərdəarxası danışıqlarda nəzərdən keçirilib və Vitkofun rəhbərliyi ilə əlaqədar tərəflər üzərində işləyiblər.
– İsrail bir həftə ərzində Qahirə və ya Dohaya nümayəndə heyəti göndərəcək.
– Razılaşma 60 günlük atəşkəsə əsaslanır.
– Atəşkəsin ilk günündə 8 sağ israilli əsir, 50-ci gündə isə 2 sağ israilli əsir azad olunacaq.
– 18 ölü sionist əsirin cəsədi üç mərhələdə təhvil veriləcək.
– Fələstinli əsirlərdən bir qismi azad olunacaq, lakin onların sayı hələ açıqlanmayıb.
– İsrail Murak oxundan geri çəkiləcək.
– Sionist rejim Qəzzəyə humanitar yardım axınını artıracaq.
– 60 gün ərzində müharibənin daimi başa çatmasına və müharibədən sonrakı Qəzzənin idarə edilməsi üçün yol xəritəsinin yaradılmasına dair danışıqlar aparılacaq.
Sionist rejimin i24news vebsaytının məlumatına görə, bu təklif əsasən Vitkofun əvvəlki planına bəzi düzəlişlərlə əsaslanır və İsrail, ABŞ və vasitəçi ölkələr HƏMAS-ın cavabını gözləyirlər. İsrail müharibəni başa çatdırmağa deyil, müharibənin bitməsi ilə bağlı danışıqlar aparmağa razıdır və ordusunun Qəzzədən geri çəkilməsinin miqyası və gələcəkdə orada yerləşməsi ilə bağlı danışıqlar davam edir.
Humanitar yardımlarla bağlı məlumatlı mənbələr bildiriblər ki, HƏMAS atəşkəs təklifini qəbul edən kimi yardımların Qəzzəyə girişi başlayacaq və bu proses 9 yanvar razılaşmasında qeyd olunan qaydalara uyğun həyata keçiriləcək, Birləşmiş Millətlər Təşkilatı və Qızıl Aypara yardımların çatdırılmasında iştirak edəcəklər.
Mənbələrin məlumatına görə, ilk gün 8 sağ israilli əsir təhvil verildikdən sonra İsrail ordusunun Qəzzənin şimalından geri çəkilməsi başlanacaq, yeddinci gün isə 5 ölü israilli əsirin cəsədi təhvil verildikdən sonra ordunun cənub Qəzzədən geri çəkilməsi başlayacaq, lakin hələ sionist ordusunun geri çəkiləcəyi sərhədlər müəyyənləşdirilməyib.
Növbəti mərhələdə daimi atəşkəslə bağlı danışıqlar başlayacaq. Vasitəçilərin rolu isə atəşkəs müddətində müharibəni dayandırmaq üçün ciddi danışıqlara təminat vermək olacaq və əgər 60 gün ərzində müharibənin bitməsi ilə bağlı razılıq əldə olunmasa, bu müddət uzadıla bilər.