İsrail Ordusunun Baş Qərargah rəisi Eyal Zamir, İsrailin Qəzzada həyata keçirdiyi soyqırım xarakterli hücumları daha da genişləndirərək ərazidə hərbi nəzarəti artırmağı və bununla HƏMAS-a təzyiq göstərməyi təklif edib. Bu plan, əvvəlki aylarda təklif olunan və Qəzza əhalisinin hamısının cənubda qurulacaq bir “humanitar şəhər”ə köçürülərək orada məhdudlaşdırılmasını nəzərdə tutan təşəbbüsə alternativ kimi irəli sürülüb – İsrail mediasının məlumatına görə.
İsrailin “Channel 12” adlı ivrit xəbər agentliyinin məlumatında bu təşəbbüs “Qəzzanın ələ keçirilməsi planı” kimi təsvir edilir.
Mənbələrin bildirdiyinə görə, plan İsrail qüvvələrinin hazırda nəzarət etdiyi 75 faizlik ərazidən daha geniş bir hissənin tədricən işğalı və bu ərazilərin əlində saxlanmasını nəzərdə tutur. Lakin Baş Qərargah rəisinin konkret olaraq Qəzzanın nə qədər əlavə ərazisinin tutulmasını təklif etdiyi açıqlanmayıb.
Zamir, son vaxtlar nazirlərlə keçirilən bir iclasda bu planın, HƏMAS-ı atəşkəs razılaşmasına məcbur etmək məqsədilə mərhələli şəkildə daha geniş ərazilərin tutulmasını ehtiva etdiyini bildirib.
Baş Qərargah rəisinin, İsrailin müdafiə naziri İsrael Katsın bu ayın əvvəlində açıqladığı “humanitar şəhər” planına qarşı çıxdığı qeyd olunur.
Katsın planı, Rafah şəhərinin (İsrailin tamamilə dağıtdığı cənubdakı son böyük şəhər) xarabalıqları üzərində, İsrailin tam nəzarətində olan bir “humanitar şəhər” inşa edilməsini nəzərdə tutur. Başlanğıc mərhələdə 600,000 fələstinli həmin şəhərə köçürüləcək və onların bu ərazini tərk etməsinə icazə verilməyəcək. Bu plan yerli və beynəlxalq ictimaiyyət tərəfindən “fələstinlilər üçün konsentrasiya düşərgəsi” kimi dəyərləndirilib.
İsrailin bu təşəbbüsünün milyardlarla dollara başa gələcəyi qeyd olunur. Bəzi ekspertlər bu planın reallaşdırılmasının qeyri-mümkün olduğunu, sadəcə təzyiq vasitəsi kimi elan edildiyini bildirirlər.
İsrail ordusunun Deyr əl-Bələh şəhərinə yerüstü hücuma başlaması bölgədəki vəziyyəti daha da gərginləşdirib. Şəhərin cənub-qərbində yaşayan əhalinin Al-Məvasi bölgəsinə köçürülməsi əmri verilib. Halbuki həmin sahil zolağı artıq yüz minlərlə məcburi köçkünə ev sahibliyi edir və resurs baxımından tamamilə yüklənmiş vəziyyətdədir.
Bazar günü gecəsi bölgəyə yönəlmiş ağır bombardman nəticəsində, İsrail ordusu “düşmənin qabiliyyətlərini və terror infrastrukturunu məhv etmək” məqsədilə hərbi əməliyyatlara davam etdiyini bildirib. Bu, humanitar böhranın daha da dərinləşməsinə səbəb olub.
Atəşkəslə bağlı danışıqlar, əvvəlki nikbin xəbərlərə baxmayaraq, yenidən çıxmaza girib. İsrail Baş naziri Benyamin Netanyahunun bəzi güzəştlərə – o cümlədən ilin əvvəlində qurulan Morag Oksinin cənub Qəzzadakı mövqelərindən geri çəkilməyə – hazır olduğu bildirilsə də, Tel-Əviv HƏMAS-ın tam məğlub edilməsində israr edir və əsir mübadiləsindən sonra belə müharibənin davam edəcəyini açıq şəkildə bəyan edir.
Digər tərəfdən, HƏMAS müharibənin daimi olaraq dayandırılmasını və İsrailin tam geri çəkilməsini tələb edir. Hərəkat, Netanyahunun silahların təhvil verilməsi şərtini isə qəti şəkildə rədd edir.
Müzakirələr dalana dirənmişkən, İsrailin Qəzzanı mühasirəyə alması bölgədə aclıq böhranına səbəb olub. Son günlərdə azı 18 nəfər – əsasən körpələr və uşaqlar – qidalanma çatışmazlığından həyatını itirib. Bu, münaqişənin yalnız hərbi deyil, eyni zamanda dərin humanitar bir fəlakətə çevrildiyini bir daha nümayiş etdirir.