Rusiyada Dubay şahzadəsi üçün hazırlanmış uzadılmış təkər bazasına malik 1962-ci ilin “Bentley S2” avtomobili satışa çıxarılıb.
Satıcı maşını 50 milyon rubla (965 min manat) satır. O, iddia edir ki, Dubay şahzadələrindən birindən sonra avtomobili Las-Veqasdakı kazinonun sahibi alıb və 2005-ci ildə nadir “Bentley” Rusiyaya gətirilib. Avtomobilə 6.2 litr həcmli və 200 at qüvvəsinə malik orijinal V8 mühərriki, həmçinin dördpilləli avtomatik transmissiya quraşdırılıb.
![](https://images.oxu.az/2024/07/23/BcRhFGrHvCFjs8eONDSyvhqXTlGlfCHjOq8Z2pX0:640.png)
2015-ci ildə avtomobil bərpa olunub, 2020-ci ildə isə əyləc sistemi dəyişdirilib. 62 yaşlı “Bentley”nin odometrində təxminən 78 min mil (125,5 min km) məsafə qeyd olunub.
![](https://images.oxu.az/2024/07/23/KeXJUlVLEBpjZZgzByNQ0otqEfR0xVaPbFzbAv4i:640.jpg)
Xatırladaq ki, “Bentley S2” 1959-1962-ci illərdə Britaniya avtomobil istehsalçısı tərəfindən istehsal edilib. Avtomobil 2,3 min nüsxədə buraxılıb, lakin onlardan yalnız 57-si uzadılmış təkər bazası ilə olub.