Doha danışıqları ilə bağlı məlumatlı fələstinli mənbələr sionistlərin razılaşmaya mane olmaq üçün aldatma siyasətinə əl atdığını bildirərək, İsrailin Qəzza zolağının təqribən yarısını hərbi işğal altında saxlamaq niyyətində olduğunu və Həmasın buna qətiyyən razı olmayacağını vurğulayıblar.
“əl-Ərəbiy əl-Cədid” saytının xəbərinə görə, fələstinli mənbələrdən biri Frans Press agentliyinə bildirib ki, İsrailin təqdim etdiyi plan Qəzza zolağını keçid və sərbəst hərəkət imkanları olmayan, təcrid olunmuş bölgələrə çevirəcək. Müzakirələr, İsrailin bu plan üzərində israr etməsi səbəbindən çətinliklərlə və çıxılmaz vəziyyətlə üzləşib. Həmin plan, İsrail ordusunun geri çəkilməsi deyil, əksinə, mövqelərinin yenidən qurulması və yerləşdirilməsini nəzərdə tutur.
İsrail Qəzzanın 40 faizini işğal etmək istəyir
Həmin mənbə əlavə edib ki, plana əsasən, İsrail ordusu Qəzzanın 40 faizindən çox ərazisində yerləşməyə davam edəcək. Həmas isə bu planı tamamilə rədd edir.
Başqa bir fələstinli mənbə də bildirib ki, İsrail razılaşmanın icrasını gecikdirmək və soyqırım müharibəsini dayandırmamaq üçün məqsədli şəkildə vaxt uzadır. İsrailin təqdim etdiyi plana əsasən, bu rejim “Morag oxu”ndan cənubda Rafah və “Filadelfiya oxu” boyu, yəni Qəzza ilə Misir arasındakı 13 km-lik sərhəd xətti boyunca mövqelərini saxlamaq istəyir. Eyni zamanda, İsrail şimalda Beyt Hanun bölgəsinin və Qəzzanın şərqində yerləşən ərazilərin 1200–3000 metr dərinliyində nəzarətini qorumağa çalışır.
Mənbə bildirib ki, İsrailin “geri çəkilmə” adı ilə təqdim etdiyi bu plan əslində mövqelərin dəyişdirilməsindən ibarətdir və sionist rejimin Qəzzada yeni məskunlaşma planlarının bir hissəsidir. Plan daxilində Qəzzanın içərisində 2–3 kilometrlik tampon zona yaradılması nəzərdə tutulur ki, bu da geri çəkilmə anlamına gəlmir.
Həmas sionistlərin bu fitnəkar planını açıq şəkildə rədd edir
Mənbə izah edib ki, Həmasın danışıqlar heyəti İsrailin bu hiyləgər planını qəbul etməyəcək. Çünki bu plan Qəzzanın təxminən yarısının yenidən işğal edilməsini qanuniləşdirəcək və bu bölgənin tamamilə təcrid olunmuş əraziyə çevrilməsinə gətirib çıxaracaq. Bu, Qəzza sakinlərinin sərbəst hərəkətini məhdudlaşdıracaq və ərazini nasist düşərgələrinə bənzər hala salacaq. Həmas, yüz minlərlə fələstinlinin Rafahın qərb hissəsinə sıxışdırılması və oradan Qəzzadan məcburi çıxarılması planını qəbul etməyəcək.
O qeyd edib ki, Qətərli və misirli vasitəçilər Həmas və İsrail heyətlərindən xahiş ediblər ki, bu plana dair danışıqları ABŞ-ın xüsusi nümayəndəsi Stiv Vitkoffun Dohaya gəlişinə qədər təxirə salsınlar.
Fələstinli mənbə əlavə edib ki, vasitəçilər danışıqlarda fikir ayrılıqlarını azaltmaq və razılaşmaya yaxınlaşmaq üçün səylərini davam etdirəcəklərinə söz veriblər. Həmas tələb edir ki, İsrail ordusu 2 martdan sonra daxil olduğu bütün ərazilərdən tamamilə geri çəkilsin. Bu tarix, yanvarda əldə olunmuş atəşkəsin pozulduğu gündür. Lakin İsrail heyəti bu tələblərə cavab verməyib və əslində danışıqlar aparmır, çünki yetərincə səlahiyyətə malik deyil.
Mənbə sonda qeyd edib ki, yardımın Qəzzaya daxil olması və əsirlərin dəyişdirilməsi məsələsində müəyyən irəliləyişlər əldə olunub, lakin danışıqların davamı gözlənilməlidir.
Qətərin “əl-Ərəbiy əl-Cədid” saytı əlavə edib ki, İsrailin Rafah xarabalıqlarında fələstinlilər üçün çəkdiyi planın təfərrüatları ortaya çıxıb. İsrail bu planı “insani şəhər” adı ilə təqdim edir. Bu planın məqsədi ən azı 600 min fələstinlini Rafah bölgəsində toplamaq və daha sonra onları Qəzzanı tərk etməyə məcbur etməkdir.
İsrailin “Yedioth Ahronoth” qəzeti bu barədə yazıb ki, İsrailin müdafiə naziri İsrael Katzın “insani şəhər” adlandırdığı bu plan hələ bir il yarım əvvəl İsrail dairələrində müzakirə olunmuşdu. Bu plana əsasən, Qəzza sakinləri bölgədən bölgəyə köçürüləcək və bu zaman ciddi yoxlamalara məruz qalacaqlar. İsrail ordusu isə bu ərazilərdə tam təmizləmə əməliyyatları həyata keçirəcək – bu da qətliam, həbslər və dağıntılar deməkdir.
Qəzet əlavə edib ki, bu plan əvvəllər Qəzzanın şimalında tətbiq edilmişdi, lakin uğursuzluqla nəticələndi. İndi isə İsrail bu planı Morag və Filadelfiya oxu arasında yerləşən bölgədə yeni və yanıltıcı adla – “insani şəhər” kimi həyata keçirmək istəyir. Bu, əslində hərbi plan yox, siyasi bir manevrdir. İsrail ordusu bu bölgəni “yeni Rafah” adlandırmağı düşünür. İsrael Katz rəsmi bəyanatında deyib: “İnsani şəhərə daxil olan heç kim oranı tərk edə bilməz. Bu şəhərə giriş yalnız dar keçidlərdən və Həmas üzvləri olmadan mümkündür.”