Bu mənzərə ucqar kəndlərdə deyil, Bakının Xətai rayonunda qeydə alınıb. Bura 3-4 min nəfər insanın yaşadığı böyük bir küçənin, Mirzə Davud küçəsinin girişidir.
Kanalizasiya sularının axdığı, çala-çuxur yolda dəfələrlə insanlar yıxılıb, xəsarət alıblar. Yerli bələdiyyə hər gün yüzlərlə insanın, xüsusən məktəblilərin keçib getdiyi bu yolu gah karton kağızlarla, gah taxta parçaları ilə, gah da torpaq tökərək abıra salmaq istəyib. Amma göydən bir damla yağış düşən kimi torpaq, karton bir-birinə qarışıb, çox biabırçı vəziyyət yaranıb.
İndi isə bu yola xalı sərərək, eyiblərini örtməyə çalışıblar. Bu, dünyanın heç bir yerində görünməmiş bir haldır. Analoqu yoxdur.
Mirzə Davud küçəsinin sakinləri dəfələrlə yolun təmir edilməsi xahişi ilə əlaqədar qurumlara müraciət ediblər. Küçədə yollar o dərəcədə bərbad haldadır ki, taksi sürücüləri bu əraziyə gəlmək istəmir, yanğın, təcili tibbi yardım maşınları bu küçəyə gəlib xəstə apararkən özləri “xəstə” düşür, evakuatorla geriyə qayıdırlar.
Anlamaq olmur, Xətai Rayon İcra Hakimiyyəti, yolların təmir tikintisi ilə məşğul olan qurumlar bu analoqu olmayan təmir üsulları ilə əraziyə turist cəlb etməyə çalışırlar, yoxsa insanlara o qədər çox dəyər verirlər ki, gələn-gedənin ayağı altına xalı sərirlər. Amma, nə yazıq ki, qırmızı xalı yox, suyun üzərini örtmək üçün palçıqlı xalı.
Xətai Rayon İcra Hakimiyyəti Mirzə Davud küçəsinin girişindəki yolun bərbad vəziyyətdə olması barədə açıqlama verib.
Qurumun ictimai-siyasi və humanitar məsələlər şöbəsinin müdiri Pənah İmanov bildirib ki, sözügedən yol nəzarətdədir: “Ötən il yolun bir hissəsi təmir olunub, hava şəraitinə görə işlər dayandırılıb. Mirzə Davud küçəsi və Polad Həşimov qəsəbəsinin biri hissəsində qalan asfalt işləri mart ayının axırı tamamlanacaq. Bu barədə aidiyyəti qurumlara məlumat verilib”.