Avtomobillərin icbari sığortasının qiymətlərinin artırılması müzakirə edilir. Artıq bəzi sığorta şirkətləri avtomobillərin icbari sığorta tariflərinin artırılacağını təxmin etdikləri üçün müraciət edənləri sığorta etməkdən imtina edirlər. Müştərilərə isə bunu proqramın işləməməsi ilə izah edirlər.
Sığortaçılar Assosiasiyasından bildirilib ki, son dövrlər daha çox aktual olan və hər bir avtomobil sahibini düşündürən bu məsələ ilə bağlı hazırda ciddi iş aparılır. Qeyd edilib ki, tariflərdə nəzərdə tutulan müvafiq dəyişiklik əsasən hadisə tarixçəsində daha çox qəza qeydə alınmış sürücülərə şamil ediləcək. Sığorta eksperti Vüsal Bədəlov hesab edir ki, əgər qərar verilərsə qiymətlərdəki dəyişiklik məsuliyyətli sürücülərə təsirsiz ötüşəcək. Qeyd edək ki, buna görə də sığorta sektorunda risk əsaslı sığorta haqqının hesablanması üsulunun tətbiqi planlaşdırılır. Ekspert deyir ki, bu üsul dünya təcrübəsində də geniş istifadə olunur. Qiymətlərdə dəyişikliyin aktuallaşması isə sürücülərin ürəyincə deyil. Xatırladaq ki, 2011-ci ildən bu günə kimi icbari sığorta tarifləri dəyişməyib. Könüllü sığortanın növləri üzrə haqlar şirkətlərin daxili qaydalarına əsasən tənzimlənir.