Çərşənbə axşamı (15 iyul), mühafizəkar “Fərhixteqan” qəzeti xəbər verib ki, İranın xarici işlər naziri Abbas Əraqçi müharibə zamanı Moskvada Rusiya prezidenti Vladimir Putinə görüşü zamanı İranın ali lideri Ayətullah Əli Xameneinin “gileyləndirici bir mesajını” çatdırıb.
Çərşənbə axşamı (15 iyul), İran prezidenti Məsud Pezeşkiyan bildirib ki, “diplomatiya pəncərəsi hələ də açıqdır”.
Pezeşkiyan xaricdə yaşayan iranlılara müraciətində əlavə edib: “Biz sülh yolunu ciddiyyətlə davam etdirəcəyik”.
Pezeşkiyan digər çıxışlarında qeyd edib ki, iyun ayında baş verən və 12 gün davam edən İsrail təcavüzü zamanı ölkənin əldə etdikləri “itirdiklərimizdən daha dəyərlidir”.
O əlavə edib: “Doğrudur, bu on iki gün ərzində biz dəyərli və əziz insanlarımızı itirdik, lakin əldə etdiyimiz həmrəylik və birliyimiz daha qiymətli oldu”, və ölkədə “birliyi və həmrəyliyi qorumağa” çağırıb.
Pezeşkiyan onu da bildirib ki, “hətta haqsızlığa məruz qalanlar, pis rəftarla qarşılaşanlar, həbsdə olanlar və ya narazı halda ölkəni tərk edənlər belə, vətəni müdafiə etmək üçün ayağa qalxdılar”, və əlavə edib ki, “təcavüz zamanı ortaya çıxan bu birlik və həmrəylik kapitalı ölçülə bilməyəcək qədər dəyərlidir”.
O davam edib ki, “sionist rejim silahlı qüvvələrin komandirlərini sui-qəsdlə aradan götürməklə rejimi böhranla üz-üzə qoyacağını düşündü, amma İslam İnqilabı Rəhbərinin müdrikliyi, şəhidlərin yerinə dərhal yeni rəhbərlər təyin etməsi və silahlı qüvvələrin güclü müdafiəsi düşmənin planlarını puç etdi”.
Digər tərəfdən, çərçənbə axşamı hökumət sözçüsü Fatimə Muhacirani mətbuat konfransında bildirib: “Biz heç vaxt müharibə istəməmişik və istəməyəcəyik, tariximiz bunu sübut edir. Amma biz nə zülmə boyun əyəcəyik, nə də onu qəbul edəcəyik və əsla təslim olmayacağıq”.
O əlavə edib ki, İran hökuməti hələ ki infrastruktur sahəsindəki itkilər də daxil olmaqla, ümumi bir dəyərləndirmə aparmayıb.
İran Rusiyanı danlayıb
Digər bir mövzuda, çərşənbə axşamı mühafizəkar “Fərhixteqan” qəzeti xəbər verib ki, İranın xarici işlər naziri Abbas Əraqçi müharibə zamanı Moskvada Rusiya prezidenti Vladimir Putinə görüşündə İranın ali rəhbəri Ayətullah Əli Xameneinin “gileyləndirici bir mesajını” çatdırıb.
“Fərhixteqan” qeyd edib ki, Rusiya İranı dəstəkləyərkən rəsmi bəyanatlar səviyyəsini aşmayıb. İranın Ukrayna müharibəsində Rusiyaya göstərdiyi dəstəkdən fərqli olaraq, Moskva İrana qarşı təcavüzə “ehtiyatla” yanaşıb.
Qəzet əlavə edib ki, İranın Rusiyanın ilk reaksiyalarından gözləntiləri doğrulmayıb və ruslar sonradan mövqelərini yaxşılaşdırmağa çalışıblar.
Məqalədə həmçinin qeyd olunub ki, reallıq göstərir ki, iki ölkə arasındakı münasibətlər və əməkdaşlıq “əvvəlki kimi davam edəcək”, lakin İran tərəfi bəzi hesablamalarına yenidən baxacaq və yalnız Rusiya ilə kifayətlənmək əvəzinə, bəzi əməkdaşlıq sahələrini yeni tərəfdaşlarla yenidən qurmağa meyilli ola bilər.
Mənbə əlavə edib: “Bu, heç bir halda İran və Rusiya arasındakı münasibətlərin səviyyəsinin azalacağı və ya iki ölkənin münasibətlərində soyuqluq dövrünə girəcəyi anlamına gəlmir”.