QafqazTimes xəbər verir ki, ABŞ-ın keçmiş prezidenti Donald Tramp 2024-cü ildə keçiriləcək prezident seçkilərində iştirakını elan edən toplantıda çıxışı zamanı bu ölkənin hazırkı hakimiyyətini növbəti dəfə tənqid edib.
Tramp “Nyu-Hempşir” ştatında Respublikaçılar Partiyasının tərəfdarlarının toplantısında deyib ki, Co Baydenin prezidentliyi dövründə Amerika korrupsioner siyasətçilər tərəfindən məhv edilməyə doğru gedir.
Amerika mətbuatının yazdığına görə, o, fikrini belə izah edib: “Bayden dövründə ölkəmiz eqoist, radikal və korrupsioner siyasi quruluş tərəfindən məhv edilir. Heç kim bilmir niyə belə edirlər.”
Demokrat Partiyasının rəhbərliyini “ifrat solçu” olaraq xarakterizə edən Tramp deyib: “Məncə, bir çox hallarda onlar marksist və kommunistdirlər. Lakin Birləşmiş Ştatlara ilk gündən gecikmədən işə başlamağa hazır olan prezident lazımdır və o adam mənəm!”
O, bundan öncə Co Baydenin prezidentliyi dövründə bu ölkənin növbəti 2 ildə sağ qalacağına şübhə ilə yanaşdığını deyərək, Vaşinqtonun indiyədək belə ağır vəziyyətdə olmadığını bildirmişdi.