ABŞ işğalçı qüvvələri Suriyada hücuma məruz qalıb

QafqazTimes xəbər verir ki, “CENTCOM” (Amerika Birləşmiş Ştatlarının Mərkəzi Komandanlığı Qərargahı) terror təşkilatı bazar günü səhər Suriyanın cənubundakı Əl-Tənf bölgəsində Amerika qüvvələrinə raket zərbəsi endirildiyini bildirib.

“Reuters”in məlumatına görə, atılan raket ABŞ bazasının kənarında partlayıb və ABŞ və ya tərəfdaş qüvvələri arasında ölən və yaralanan olmayıb.

CENTCOM raket mənşəyində daha bir neçə raket tapıldığını və bu hadisənin araşdırıldığını bildirib. Bu hadisənin təfərrüatları açıqlanmayıb.

Bu hadisədən bir neçə saat əvvəl Suriya Xarici İşlər Nazirliyi bəyanat yayaraq, ABŞ-ın işğalçı qüvvələrinin Suriyadan dərhal çıxarılmasının və bu ölkənin terrorçulara, muzdlulara və separatçı qüvvələrə dəstəyini dayandırmasının vacibliyini vurğulayıb.

Həmin bəyanatda Suriya Xarici İşlər Nazirliyi həmçinin Suriya neftinin oğurlanması və Şimali İraqa nəqli ilə bağlı ABŞ-ın siyasətlərinin davam etdirilməsinin dəniz quldurluğu və müstəmləkəçilik cəhdi olduğunu bildirib.

Suriya həmçinin xatırladıb ki, ABŞ-ın hərəkətləri beynəlxalq qanunlar və Birləşmiş Millətlər Təşkilatının nizamnaməsinə ziddir və Təhlükəsizlik Şurası bu cür hərəkətləri pisləməli və onların qarşısını almaq üçün addımlar atmalıdır.

Suriya Xarici İşlər Nazirliyi həmçinin bu ölkənin əmlakının talanması və vurduğu ziyana görə Suriyanın ABŞ-dan təzminat tələb etmək hüququnun olduğunu vurğulayıb.

Şənbə günü bu bəyanatın verilməsindən bir neçə saat əvvəl Suriyanın şimal-şərqindəki yerli mənbələr ABŞ ordusu tərəfindən 50 Suriya neft tankerinin ələ keçirildiyini bildirib. Suriya mənbələrinin məlumatına görə, bu neft tankerləri qeyri-qanuni “Əl-Mahmudiyyə” keçidindən keçərək Şimali İraqdakı Amerika hərbi bazalarına daxil olub.