Suriya ilə İsrail arasında sülh “çox mümkündür” – bu açıqlamanı keçən həftə Qəzza Humanitar Fondu (GHF) rəhbərliyinə təyin olunan evangelist pastor Conni Mur Dəməşqdə Suriyanın müvəqqəti prezidenti Əhməd əl-Şaraa ilə görüşdən sonra verib.
Mur ilə birlikdə ABŞ-ın yəhudi insan haqları təşkilatı olan Simon Vizental Mərkəzinin nümayəndəsi ravvin Avraham Kuper də görüşdə iştirak edib. Hər iki şəxs uzun illərdir Qərbi Asiyada İsraillə münasibətlərin normallaşdırılmasını təşviq edən fəaliyyətlə məşğuldur.
Onlar bazar ertəsi axşamı prezident sarayında Şaraa ilə görüşüblər. Səfərin əsas məqsədi Suriya-İsrail münasibətlərini müzakirə etmək olmasa da, söhbət zamanı bu mövzuya da toxunulub.
“Sülh məncə çox mümkündür, hətta ehtimal daxilindədir, lakin ilk prioritet Suriyanın diqqətini öz daxili məsələlərinə yönəltməsi olmalıdır,” – deyə Mur bildirib.
O əlavə edib ki, Şaraa “narahat olduğu məsələləri səsləndirdi, lakin eyni zamanda çox pozitiv bir gələcəyin mümkünlüyündən də danışdı.”