Təşkilatın həbsdə olan lideri Abdullah Öcalanın çağırışına uyğun olaraq tərksilah prosesi başlayıb.
Kürdüstan Fəhlə Partiyasının (PKK) bir qrup döyüşçüsü 11 iyul tarixində İraqın şimal Kürdüstan bölgəsində silahlarını yerə qoyaraq tərksilah mərasimi keçirib. Bu, tarixi rəqiblər arasında aylardır davam edən atəşkəsə baxmayaraq Türkiyənin təşkilata qarşı hücumlarını davam etdirdiyi bir vaxta təsadüf edir.
Mərasim başladıqdan cəmi 30 dəqiqə sonra Türkiyə ordusu Dohuk vilayətinin Amediya rayonundakı kəndlərə hava zərbələri endirib.
Cümə günü Sulaimaniya vilayətinin yaxınlığında kiçik miqyaslı mərasim keçirilib. 20-30 PKK döyüşçüsü simvolik bir jest olaraq silahlarını məhv edib, lakin bu silahlar rəsmi qurumlara təhvil verilməyib.
Sosial mediada yayılan görüntülərdə döyüşçülərin silahlarını yandırmaq üçün tonqalın içinə yerləşdirdikləri görünür.
Kürd xəbər agentliyi Rudawın məlumatına görə, mərasimdə iştirak edənlər arasında AK-47 avtomatları, PKM pulemyotları və snayper tüfəngləri olan təxminən 30 nəfərlik döyüşçü qrupu olub.
Döyüşçülər mərasimdə Türkiyədə kürdlərin hüquqları uğrunda demokratik siyasi fəaliyyətə sadiq olduqlarını bəyan ediblər.
“Barış və Demokratik Cəmiyyət Qrupu” adından verilən bəyanatda PKK döyüşçüləri tərksilah qərarını “Barış və Demokratik Cəmiyyət” prosesinin praktik uğurunu təmin etmək, azadlıq, demokratiya və sosialist mübarizəni hüquqi və demokratik siyasi metodlarla davam etdirmək üçün atılan addım kimi dəyərləndiriblər.
Silahların məhv edilməsi “xoş niyyət və qətiyyət jesti” kimi təqdim olunub.
Ankara bu addımı alqışlayıb. Türkiyə Prezidenti Rəcəb Tayyib Ərdoğan bunu “ölkəmizin ayaqlarına vurulmuş qanlı zəncirlərin tamamilə qoparılıb atılması” kimi dəyərləndirib və bu addımın bölgəyə fayda verəcəyini söyləyib.
Mərasimə bir neçə həftə qalmış Türkiyə hücumları İraqın şimalında kürd bölgələrini hədəfə almaqda davam edib.
ABŞ mərkəzli Münaqişə Həll Təşkilatı (Community Peacemaker Teams – CPT) 10 iyul tarixində bildirib ki, “Türkiyə hərbi zərbələri və əməliyyatları – mərasimə yaxınlaşdıqca – daha spesifik ərazilərdə cəmləşsə də, davam edib”.
CPT qeyd edib ki, may ayındakı artımdan sonra iyun ayında bombardmanlar və hücumlar əvvəlki ayla müqayisədə 8 faiz artsa da, atəşkəsdən əvvəlki səviyyədən yuxarı qalmağa davam edir.
“Xüsusilə, zərbələrin və atəşlərin 98 faizi Dohuk vilayətinin Amediya rayonunda baş verib, bu da əvvəlki illərlə müqayisədə coğrafi olaraq daha dar bir sahədə cəmlənməni göstərir,” – təşkilat əlavə edib.
1 iyun – 30 iyun tarixləri arasında İraq Kürdüstanında ən azı 550 bombardman və hücum sənədləşdirilib.
PKK Türkiyəyə qarşı onilliklərdir davam edən partizan müharibəsi aparır. Onun lideri Abdullah Öcalan 1999-cu ildən bəri Türkiyənin İmralı adasındakı həbsxanada ömürlük cəza çəkir.
Fevral ayında Öcalan PKK-ya silahları yerə qoymaq çağırışı edib.
Qrup bu məsələ ilə bağlı Türkiyədəki pro-kürd Xalqların Bərabərlik və Demokratiya Partiyası (DEM) ilə danışıqlar aparır. Onlar tərksilah qarşılığında hüquqi və siyasi zəmanətlər, konstitusiya islahatları və kürdlər üçün bərabər hüquqlar tələb edirlər. Eyni zamanda, liderlərinin həbsdən azad edilməsinə ümid edirlər.
Öcalan 9 iyulda yayımlanan video-müraciətində silahlı mübarizənin sona çatdığını elan edərək çağırışını bir daha təkrarlayıb.
1 mart tarixində PKK, Öcalanın çağırışına uyğun olaraq, Türkiyə dövlətinə qarşı dərhal atəşkəs elan edib.
PKK Suriyada ABŞ tərəfindən dəstəklənən Suriya Demokratik Qüvvələri (SDF) ilə də sıx əlaqəlidir. Bu qüvvələr ilin əvvəlində Dəməşqlə razılaşma imzalayaraq yeni Suriya ordusuna inteqrasiya olunmalı idi. Bu inteqrasiya hələ baş verməyib. Ankara isə SDF-ni “vaxt uzatmaqda” ittiham edərək dərhal Dəməşq qüvvələrinə qoşulmağa çağırır.
