Azərbaycanın quru sərhədlərinin açılıb-açılmayacağı məsələsi yenidən gündəmdədir. Ölkəmizdə karantin müddəti sonuncu dəfə iyulun 1-dək uzadılıb və bir neçə həftə sonra məsələ ilə bağlı yeni qərar veriləcəyi gözlənilir.
Quru sərhədlərin bağlı qalması turizmə mənfi təsir göstərsə də, bu istiqamətdə milli maraqlar ön planda saxlanılır.
Azərbaycan Milli İstiqlal Partiyasının sədri Arzuxan Əlizadə bildirib ki, quru sərhədlər pandemiya dövründə bağlanıb və karantin rejiminin müddəti uzadıldıqca bu məhdudiyyətlər davam etdirilib.
Onun sözlərinə görə, hazırkı dövrdə sərhədlərin bağlı qalması artıq birbaşa pandemiya ilə deyil, daha çox dövlət və milli təhlükəsizlik məsələləri ilə əlaqədardır:
“Azərbaycan elə bir geosiyasi məkanda yerləşir ki, ölkənin dövlət suverenliyi və milli təhlükəsizliyi daim xüsusi diqqət mərkəzində saxlanılmalıdır. Xüsusilə 44 günlük Vətən müharibəsindən sonra regionda yaranmış yeni reallıqlar bu məsələyə yanaşmada əlavə həssaslıq tələb edir. Məhz bu səbəbdən sərhədlərin açılması ilə bağlı qərar hökumət tərəfindən ehtiyatla və təhlillər əsasında qəbul edilir və bu proses hələ də davam edir. Gözlənilir ki, iyul ayının 1-dən sonra sərhədlərin taleyi ilə bağlı növbəti rəsmi qərar veriləcək”.
Deputat vurğulayıb ki, şübhəsiz, quru sərhədlərin uzun müddət bağlı qalması bir sıra sahələrə, xüsusilə də turizm sektoruna mənfi təsir göstərir. Eyni zamanda Azərbaycan vətəndaşlarının xarici ölkələrə səyahət imkanlarını da məhdudlaşdırır:
“Digər tərəfdən, quru sərhədlərin bağlı qalması xüsusilə Gürcüstandakı Borçalı bölgəsində yaşayan soydaşlarımızın Azərbaycana gediş-gəlişini məhdudlaşdırır. Bu istiqamətdə hərəkət yalnız hava nəqliyyatı vasitəsilə mümkündür ki, bu da bir çox insanlar üçün əlçatan deyil. Eyni problem Rusiyada və digər qonşu ölkələrdə yaşayan Azərbaycan vətəndaşlarının da hərəkət imkanlarında əngəl yaradır”.
A.Əlizadə onu da qeyd edib ki, bütün bu çətinliklər milli təhlükəsizlik məsələləri ilə müqayisədə daha az əhəmiyyət daşıyır:
“Dövlət təhlükəsizliyi və milli maraqlar hər zaman prioritetdir və bu baxımdan quru sərhədlərin bağlı qalmasını anlayışla qarşılamaq lazımdır. Əminik ki, mövcud təhdidlər minimum həddə endirildikdən sonra quru sərhədlərin də açılması və vəziyyətin normal məcraya qaytarılması mümkün olacaq”.