Qafqaz Times-ın verdiyi məlumata görə, dünən (17 iyul) səhər saatlarında ivritdilli media Qəzzada sionist hərbçilərə müqavimət qüvvələrinin yeni zərbə endirdiyini bildirib. Məlumata görə, Qəzza şəhərinin şərqində yerləşən Əş-Şucaiyyə məhəlləsində baş verən toqquşmalarda 5 israilli hərbçi yaralanıb, onlardan 2-nin vəziyyəti ağırdır.
Sionist ordusu 17 iyul səhər verdiyi bəyanatda qeyd edib ki, Paraşütçü Briqadasının 202-ci batalyonuna aid iki hərbçi dünən Qəzza zolağının şimalında gedən döyüşlərdə ağır yaralanıb.
İvrit mediası həmçinin bildirib ki, Yahlom adlı xüsusi bölməyə aid bir ehtiyat hərbçi Qəzzanın mərkəzində baş verən partlayışda yaralanıb.
Digər tərəfdən, Həmas hərəkatının hərbi qolu olan İzzəddin əl-Qəssam briqadaları dünən gecə bəyanat yayaraq bildirib ki, onların döyüşçüləri, İslam Cihadının hərbi qanadı olan Saraya əl-Qüds birlikləri ilə birlikdə, Qəzza zolağının cənubunda – Xan Yunusun Əl-Qeyzan bölgəsində sionist ordusunun komanda və idarəetmə mərkəzini hədəfə alıblar.
Qəssam döyüşçüləri cəbhə xəttindən qayıtdıqdan sonra bildiriblər ki, çərşənbə axşamı günü Xan Yunusun Əs-Sətr bölgəsində sionist ordusunun hərbçilərini və hərbi nəqliyyat vasitələrini hədəf alıblar.
İvritdilli media, İsrailin Qəzza müharibəsindəki itkiləri ilə bağlı məlumatların yayılmasına qarşı ciddi hərbi senzura tətbiq etdiyini və açıqlanan rəsmi rəqəmlərin əsl tələfat sayından xeyli az olduğunu bildirib.