Sionist rejimin keçmiş Baş Qərargah rəisi və keçmiş müharibə kabinetinin üzvü bildirib ki, Benyamin Netanyahu siyasi səbəblərə görə əsir mübadiləsi razılaşmasının reallaşmasına mane olub.
Qafqaz Times-ın məlumatına görə, sionist rejimin keçmiş Baş Qərargah rəisi və keçmiş müharibə kabinetinin üzvü Qadi Ayzenkot, sionist rejimin baş naziri Benyamin Netanyahunun fəaliyyətini və Qəzza müharibəsinin uzanmasını tənqid edərək deyib: “Netanyahu əsir mübadiləsi razılaşmalarını siyasi səbəblərlə uğursuzluğa uğratdı.”
Sionist rejimin Kanal 12 televiziya kanalının xəbərinə görə, Ayzenkot aydın şəkildə bildirib ki, Netanyahu siyasi səbəblərlə əsir mübadiləsi razılaşmasının həyata keçməsinə mane olub.
Bu açıqlamalar, ABŞ prezidenti Donald Tramp və onun Yaxın Şərq üzrə nümayəndəsi Stiv Vitkofun daha əvvəl Həmas-ı razılaşmaya mane olmaqda ittiham etməsindən sonra verilir. Tramp və Vitkofun bu açıqlamaları Fələstin müqavimətinin kəskin tənqidi ilə qarşılandı.
Fələstin İslam Müqavimət Hərəkatı (Həmas) Siyasi Bürosunun üzvü İzzət ər-Rişq şənbə günü verdiyi açıqlamada Tramp və Vitkofun sözlərinə təəccübləndiyini bildirərək əlavə edib: “Bu sözlər vasitəçilərin qiymətləndirmələri ilə ziddiyyət təşkil edir və danışıqlar prosesində əldə olunmuş real irəliləyişlə uyğun gəlmir.”
Həmas Siyasi Bürosunun üzvü qeyd edib ki, vasitəçi olan iki ölkə – Qətər və Misir – hər zaman Həmas-ın ciddiliyindən və konstruktiv yanaşmasından razılıq ifadə ediblər.