İvritdilli bir media orqanı etiraf edib ki, sionist rejim nə müdafiə və havadan hücum əleyhinə sistemlər dövründə daxili cəbhəni və binaları qorumaq gücünə malik olub, nə də İranın raketləri düşəndən sonra bu problemi həll edəcək bir çıxış yolu tapıb.
Qafqaz Times -ın məlumatına görə, “İsrael Hayom” qəzeti bu mövzuda yazdığı məqalədə etiraf edib ki, İsraildə (işğal olunmuş Fələstin) yüz minlərlə mənzil məsul qurumlar tərəfindən hələ də nəzarətsiz vəziyyətdə qalıb. Halbuki son müharibə göstərdi ki, İsrail zərər görən ərazilərin sürətlə bərpasına ciddi ehtiyac duyur.
Bu ivritdilli medianın yazdığına görə, 12 günlük müharibədən əvvəlki səriştəsizliklə müharibədən sonrakı bacarıqsızlıq birləşərək İsrail üçün problem yığını yaradıb.
Məqalənin müəllifi bildirib ki, İranla 12 günlük müharibə zamanı təkcə Bat Yam şəhərində azı 17 böyük bina yerlə-yeksan edilib, Rehovotda 13 bina eyni aqibəti yaşayıb, Ramat Gan şəhərində isə 8 bina dağılıb; bununla yanaşı, İsrailin bir çox infrastruktur obyektləri də sıradan çıxıb.
Bat Yam şəhərinin meri Zvika Brot bu barədə mediaya açıqlamasında bildirib ki, zədələnmiş obyektlərin tezliklə və qısa müddətdə bərpası ilə bağlı heç bir nikbinliyi yoxdur. O, “İsrael Hayom” qəzetinə deyib: “İranın raketləri şəhərdə geniş dağıntıya səbəb olub, əgər ən qısa zamanda bərpa işlərinə başlasaq belə, bu proses ən azı 2-3 il çəkəcək. Bunun üçün bələdiyyənin və rəsmi qurumların bütün imkanları səfərbər olunmalı və qanunvericilikdə dəyişikliklər edilməlidir”.
O, şəhərə dəyən zərərin miqyasından danışaraq deyib: “Ən azı 120 dönüm ərazi zədələnib, 75-dən çox böyük bina zərər görüb, onlardan 20-si tamamilə sökülüb yenidən tikilməlidir”.
“İsrael Hayom” qəzetinin bu gün yaydığı məlumata əsasən, müvəqqəti yerləşdirilən sionistlərin sayı 12 min nəfəri ötüb və onlar 90 otelə yerləşdirilib. Rəsmi olaraq 29 nəfərin öldüyü, 3400-dən çox insanın isə yaralandığı açıqlanıb. Eyni zamanda, 38700 müraciət forması daxil olub, onların ümumi dəyəri 7 milyard şekeli keçib, bu rəqəm isə 40 milyard şekeli keçən təhlükəsizlik xərclərinə daxil deyil. Bundan əlavə, cavabsız qalan çoxsaylı suallar da var (çünki bu məlumatlar yalnız mülki ərazilərə və İsrail senzura idarəsinin xəbərlərin yayılmasına icazə verdiyi məntəqələrə aiddir).
Qeyd edək ki, mediada, bütün xəbərlərin tam yayılmasına qoyulan qadağalara baxmayaraq, tez-tez gündəmə gətirilən əsas suallardan biri İran raketlərinin İsrailin hərbi və təhlükəsizlik infrastrukturuna vurduğu zərərin miqdarına aiddir. Tel-Əviv isə bu məlumatların yayılmasının qarşısını almaqda israrlıdır.