İsrail ordusu 19 iyun, cümə axşamı günü səhər saatlarında İranın Xondab (Arak) yaxınlığındakı ağır su reaktorunu bombaladığını açıqlayıb. İsrail iddia edir ki, hücumun hədəfi plutonyum istehsalında istifadə olunan əsas komponentlərdən biri – reaktorun əsas möhürü olub. Məqsəd bu obyektin bərpasının və yenidən istifadəsinin qarşısını almaq idi.
İran dövlət televiziyası isə hadisə ilə bağlı verdiyi açıqlamada bildirib ki, obyekt əvvəlcədən evakuasiya olunub və radiasiya ilə bağlı heç bir təhlükə yoxdur.
Daha sonra İranın Atom Enerjisi Təşkilatı (AEOI) hadisəyə dair rəsmi bəyanat yayımlayaraq İsrailin hücumunu kəskin şəkildə qınayıb:
“Beynəlxalq hüququn nüvə obyektlərinə hücumu qəti şəkildə qadağan etməsinə baxmayaraq, sionist düşmən bu səhər Şəhid Xondab ağır su kompleksinə və onun tədqiqat reaktoruna hücum edib.”
Təşkilat hadisə zamanı heç bir insan tələfatının olmadığını təsdiqləyib və əlavə edib:
“Əvvəlcədən həyata keçirilən təhlükəsizlik tədbirləri sayəsində ətraf ərazilərdə yaşayanlar üçün heç bir təhlükə və ya zərər yoxdur.”
AEOI həmçinin bildirib ki, İsrailin bu hücum və təhdidləri bir neçə dəfə Beynəlxalq Atom Enerjisi Agentliyinə (MAQATE) bildirilib, lakin təəssüf ki, agentlik heç bir tədbir görməyib. Bu səhərki hücum da rəsmi şəkildə MAQATE-yə bildirilib.