HƏMAS-ın əl-Qəssam Briqadaları cümə axşamı Qəzza zolağında israilli əsgərin öldürülməsi və silahlarının ələ keçirilməsini göstərən video yayımlayıb. Görüntülərdə fələstinli döyüşçülər israilli əsgəri qaçırmaqdan vaz keçib, onu yerindəcə zərərsizləşdirirlər.
Kadrlarda əks olunanlar İsrail ordusunun insidentlə bağlı yaydığı rəsmi açıqlama ilə ziddiyyət təşkil edir və ölkə mediasında kəskin tənqidə səbəb olub.
Şərhçilər ordunu əsgərləri lazımi şəkildə qorumamaqda və HƏMAS-a qarşı əvvəlki səhvləri təkrarlamaqda ittiham ediblər.
Videoda HƏMAS döyüşçüləri Xan Yunisin şərqində yerləşən Əbəsan əl-Kabira bölgəsində yerli istehsal olan zireh əleyhinə raketlə israilli buldozeri hədəfə alır.
Ehtiyatda olan israilli əsgər Avraham Azulay zərbədən sonra buldozerin içindən çıxaraq qaçmağa çalışır. Kadrlarda o, bir müddət sonra yerə sərilmiş halda görünür, yaxınlıqda isə HƏMAS döyüşçüləri onun silahını götürərək ərazidən uzaqlaşırlar.
Çərşənbə günü keçirilən hücumdan sonra HƏMAS açıqlayıb ki, “əsgərlərdən birini əsir götürmək istəsələr də, döyüş şəraiti buna imkan vermədiyindən onu zərərsizləşdirib silahını ələ keçiriblər”.
İsrail ordusu isə fərqli izahat verərək bildirib ki, HƏMAS döyüşçüləri tuneldən çıxaraq qüvvələrə hücum ediblər və Azulayı əsir götürmək istəyiblər. Ordunun açıqlamasına görə, əsgər onlarla çarpışıb və nəticədə “terrorçular onu güllələyərək öldürüblər”. Həmin an yaxınlıqda olan israilli əsgərlər “bir neçə” HƏMAS döyüşçüsünü vuraraq qaçırmanın qarşısını alıblar.
Lakin HƏMAS-ın paylaşdığı montaj edilmiş video bu rəvayətlə ziddiyyət təşkil edir. Azulay döyüşçülərlə qarşı-qarşıya gəlmək əvəzinə onlardan qaçır, fələstinli döyüşçülər isə heç bir zərər görmədən ərazini tərk edirlər.
İsrailin “Kanal 12” televiziyasının müxbiri Almog Boker bildirib ki, Azulayın öldürülməsi əsgərlərin “tam güclə döyüşdüyünü” göstərsə də, ordu “hələ də dərs çıxarmayıb”.
“Puma insidentindən sonra — yeddi əsgəri itirdiyimiz və terrorçuların zirehli nəqliyyat vasitəsinə qalxıb içəriyə partlayıcı atdığı hadisədən sonra — necə olur ki, buldozer operatoru Xan Yunisdə müşayiət olunmadan işləyir?” — Boker X platformasında yazıb.
O, iyun ayının sonlarında baş vermiş hücuma istinad edib. Həmin vaxt fələstinli döyüşçü zirehli personal daşıyıcıya (APC) partlayıcı ataraq yeddi israilli əsgəri öldürmüşdü.
“Bəli, bu müharibədir və ağrılı itkilər var. Amma döyüş meydanındakı faktlar və əsgərlərin ifadələri bizə göstərir ki, itkiləri minimuma endirmək üçün daha çox şey etmək mümkündür,” — Boker əlavə edib.
“Qorxulu nəticələr”
“Yedioth Ahronoth” qəzeti qeyd edib ki, HƏMAS-ın günorta vaxtı həyata keçirdiyi hücum “qorxulu nəticələr doğurur”.
“Bu ay ikinci dəfədir ki, HƏMAS ehtiyatda olan baş çavuş Avraham Azulayın öldürülməsi və əsir götürülməsi cəhdini yaxın məsafədən çəkilmiş video ilə sənədləşdirir,” — qəzet yazır.
“Kadrlarda həmçinin Qəzza zolağında uzunmüddətli döyüşlərin fonunda ortaya çıxan başqa bir ciddi problemin işartıları görünür: İsrail ordusu mülki mühəndis texnikasından istifadə etməyə məcbur qalır.”
Qəzetin məlumatına görə, bu hal 7 oktyabrdan bəri hərbi texnikanın həddindən artıq aşınması və sıradan çıxması ilə bağlıdır. Nəticədə ordunun istifadə edə biləcəyi texnika sayı kritik dərəcədə azalıb.
Bu son hücum Qəzza zolağında israilli əsgərlərə qarşı artan pusqu hücumlarının fonunda baş verir.
Bu həftənin əvvəlində HƏMAS döyüşçüləri İsrailə sərhəd yaxınlığında yerləşən Beyt Hanun bölgəsində pusqu quraraq beş əsgəri öldürüb, azı 14 nəfəri isə yaralayıb.
Bu insident Qəzza müharibəsinin başlanmasından bəri İsrail quru qüvvələrinə qarşı həyata keçirilmiş ən ölümcül hücumlardan biri hesab olunur.
İsrail rəsmilərinin məlumatına görə, 7 oktyabr 2023-cü ildən bəri azı 890 israilli əsgər həlak olub. Onların təxminən yarısı Qəzzaya quru hücumu başladıqdan sonra öldürülüb.
Təkcə bu ayın əvvəlindən bəri azı 13 israilli əsgər öldürülüb.