Sionist rejimin baş naziri Benyamin Netanyahu Vaşinqtonda olarkən, İsrailin siyasi səhnəsi ciddi bir qarışıqlığa düçar olub. Haredi (ultra-ortodoks yəhudi) fraksiyası ritorikasını sərtləşdirib və onların etirazları bütün qanun layihələrinin gündəlikdən çıxarılmasına səbəb olub.
Qafqaz Times -ın məlumatına görə, ivritdilli “Ynet” xəbər saytı bu barədə hazırladığı reportajda yazır: Haredilər bildirirlər ki, yeni hərbi xidmət qanunu onların cəmiyyətdəki imicinə zərər vurur. Onlar açıq şəkildə bildiriblər ki, yalnız hərbi xidmətdən azad olmalarını təmin edən konkret qanun istəyirlər və hər hansı prinsiplər üzərində razılaşma sənədini qəbul etməyəcəklər. Bu çərçivədə qanunvericilik iclaslarını boykot etməklə hədələyiblər. Bu da hakim koalisiyanı, xüsusilə müxalifət partiyalarının da bu iclasları boykot etməsi fonunda, bütün təqdim ediləcək qanun layihələrini dərhal gündəlikdən çıxarmağa məcbur edib.
Hesabatda əlavə olunur: Haredilər bugünkü və sabahkı Knesset iclaslarında səsverməni boykot etməklə hədələdiyi bir vaxtda, müxalifət partiyalarının üzvləri də koalisiyanın irəli sürdüyü bütün qanunlara qarşı səs verəcəklərini bildiriblər.
Haredilər Netanyahunun Vaşinqton səfəri başlayarkən məcburi hərbi xidmət qanununa qarşı fəaliyyətlərini daha da gücləndiriblər. Onlar koalisiyadakı nümayəndələrlə görüşlərdə açıq şəkildə bildiriblər ki, yalnız hərbi xidmətdən azad edilmələrini təmin edən bir qanunla razılaşacaqlar, prinsipial razılaşmalar onları qane etmir. Bu isə İsrail Knessetindəki qanunvericilik prosesinin dayanmasına səbəb olub.
Digər tərəfdən, Mavi-Ağ partiyasının rəhbəri Benni Qantz Haredilərin hərbi xidmətdən azad edilməsinə dair qanun təklifinə cavab olaraq bildirib: “Hazırda İsrail ordusunun azı 12 min hərbiçiyə ehtiyacı var. Biz isə iki ildir vaxt uzatmaq və sabotajla qarşılaşırıq. Bu, müharibənin başlanğıcından bəri davam edir və bu addımlar İsrailin təhlükəsizliyinin açıq-aşkar pozulmasıdır. Mən gözləyirdim ki, baş nazir Vaşinqtona qaçmazdan əvvəl ümumi hərbi xidmət qanununun təsdiqinə israr edəcək.”
Yair Lapid, “Yeş Atid” partiyasının rəhbəri və Knessetdə müxalifət lideri də Haredilərin azadlıq qanunu təklifinə münasibət bildirərək deyib: “Haredilər Netanyahunun təyyarəyə minməsindən əvvəl ona açıq şəkildə bildiriblər ki, əgər kabinetdə qalmasını istəyirsə, bunun qarşılığında bir bədəl ödəməlidir və bu bədəl bütün haredi gənclərinin hərbi xidmətdən azad edilməsidir.”
Lapid əlavə edib: “Şahid olduğumuz şey açıq-aşkar bir şantajdır və Netanyahu dərhal buna boyun əymişdir. Haredi partiyalarının rəhbərləri üçün İsrail ordusunun ehtiyat qüvvələrini xidmətə çağırmaqda heç bir problem yoxdur – təki onların övladları ölüm riski ilə üz-üzə qalmasın.”