İranın Kəşfiyyat Nazirliyi rəsmi bəyanat yayaraq, sionist rejimə məxsus olduqca həssas və yüksək təhlükəsizliklə qorunan sənədlərin geniş miqyaslı kəşfiyyat əməliyyatı nəticəsində İrana ötürüldüyünü açıqlayıb. Nazirlik əməliyyatın çoxmərhələli təhlükəsizlik sistemlərini aşaraq həyata keçirildiyini və rejim tərəfindən aşkarlanmadığını bildirib.
Bəyanatda önə çıxan məqamlar:
— Əldə olunan sənədlərə sionist rejimin gizli nüvə silah proqramına dair ətraflı məlumatlar daxildir. Bunlara nüvə tədqiqatları, infrastruktur, ABŞ və Avropa institutları ilə əməkdaşlıq və gələcək planlar haqqında məlumatlar daxildir.
— Sənədlər həmçinin hərbi və raket proqramları, ikili istifadə texnologiyaları, habelə sionist rejimlə əməkdaşlıq edən rəsmi şəxslərin, alimlərin və xarici vətəndaşların şəxsi məlumatlarını da əhatə edir.
— Məlumatların əhəmiyyətli hissəsi İran Silahlı Qüvvələri tərəfindən istifadə ediləcək, bir qismi isə dost ölkələrlə və sionizmə qarşı müqavimət qüvvələri ilə paylaşılacaq. Seçilmiş hissələr isə ictimaiyyətə açıqlanacaq.
— İran sənədlərdə ABŞ və Avropa ölkələrinin sionist rejimin silah proqramları ilə əməkdaşlıq etdiyini və bu layihələrə maliyyə dəstəyi verdiyini göstərən sübutların yer aldığını bildirib. Tehran bu dövlətləri ikiüzlülükdə ittiham edir — bir tərəfdən sionist rejimi dəstəklədikləri, digər tərəfdən isə İranın sülhməramlı nüvə proqramına təzyiq etdikləri üçün.
— Əldə olunan sənədlərdə, İsrailin İranın nüvə fəaliyyəti ilə bağlı beynəlxalq qurumlara saxta hesabatlar təqdim etdiyi və bu saxta məlumatların beynəlxalq hesabatlarda olduğu kimi təkrarlandığı bildirilir. İran bu faktı “süni ssenarilərin” ifşası kimi təqdim edir.
— İddialara görə, əməliyyat zamanı İran kəşfiyyatçıları sionist rejimin çoxsəviyyəli təhlükəsizlik sistemlərini və mürəkkəb qoruma dəhlizlərini keçməyi bacarıb. Əməliyyat o qədər səssiz və peşəkar şəkildə həyata keçirilib ki, rejim bu sızıntının necə baş verdiyini hələ də müəyyən edə bilməyib.
— İran rəsmiləri son zamanlar İsraildə aparılan həbsləri rejimin daxili təhlükəsizlik uğursuzluğunu ört-basdır etmək cəhdi kimi qiymətləndirir.
İran Kəşfiyyat Nazirliyi bu əməliyyatı sionist rejimə qarşı kəşfiyyat savaşında dönüş nöqtəsi adlandıraraq, onun “sarsılmazlıq mifini” dağıtdığını bəyan edib. Bu uğur “Müqavimət oxu” üçün tarixi zəfər kimi təqdim olunub.