Həmas-ın danışıqlar heyətinin üzvü Qazi Həmid bildirib ki, düşmən döyüş meydanında əldə edə bilmədiklərini danışıqlarla qazanmaq istəyir, lakin biz sionistlərin planlarını diktə etməyə imkan vermədik və əldə olunacaq razılaşma Qəzza xalqının hüquqlarını tam şəkildə təmin etməlidir.
Qafqaz Times-ın məlumatına görə, ABŞ-ın dəstəyi ilə sionist rejimin Doha şəhərində Qəzza atəşkəsi ilə bağlı aparılan danışıqlarda davamlı olaraq maneələr yaratması və aldadıcı hərəkətlər etməsi fonunda Həmas hərəkatının yüksək rütbəli liderlərindən biri olan “Qazi Həmid” ötən gecə verdiyi açıqlamada bildirib ki, bu hərəkat Qəzza zolağında atəşkəs razılaşmasına nail olmaq üçün ciddi addımlar atıb.
Sionistlərin planlarını diktə etməsinə icazə vermədik
Həmas-ın danışıqlar heyətinin üzvü olan Qazi Həmid qeyd edib: Amerikanın Dohadakı danışıqlardan çıxması təəccüblü olub və bu ölkə heç bir izahat verməyib. Halbuki, Həmas bizi razılaşmaya yaxınlaşdıran məntiqli və reallığa uyğun bir baxış bucağı təqdim etmişdi. Həmas danışıqlar müddətində çox sərt və təhlükəli bir savaşdan keçdi və bu mübarizənin əhəmiyyəti və təhlükəsi döyüş meydanındakı savaşdan az deyildi.
O əlavə edib: İşğalçılar döyüş meydanında əldə edə bilmədiklərini danışıqlar vasitəsilə əldə etmək istəyirlər, lakin biz danışıqlar müddətində işğalçıların planlarını diktə etməsinə mane ola bildik. Qarşımızda iki seçim vardı: ya bütün nəzarəti sionist tərəfə verən sürətli bir razılaşma, ya da yaxşı bir razılaşma. Həmas heç vaxt atəşkəs razılaşmasının əldə olunmasına maneə olmayıb və hər dəfə razılaşmaya yaxınlaşdığımızda, sionist düşmən tərəfindən yeni maneələr yaradılır və Qəzzaya qarşı hərbi hücumlar intensivləşir.
Bu Həmas rəsmisi vurğulayıb ki, Həmas son danışıqlar zamanı sionistlərin danışıqlarda diktə etməyə çalışdığı bir çox şərtlərin dəyişdirilməsində uğur qazanıb. Bizim danışıqlardakı əsas məqsədimiz Fələstin xalqına qarşı müharibənin dayandırılması və sionistlərlə əldə olunacaq istənilən razılaşma çərçivəsində mümkün qədər çox sayda fələstinli əsirin azad olunmasıdır. Həmas danışıqlarda irəli sürülən bütün məsələlərə qarşı çevik və pozitiv yanaşıb ki, bu da Fələstin xalqının hüquqlarının təmin olunmasına xidmət etsin.
Danışıqların dağılmasına icazə verməyəcəyik
Qazi Həmid bildirib: Biz hazırda elə bir razılaşma üzərində işləyirik ki, bu, müharibənin dayandırılmasına və 60 gündən sonra işğalçıların Qəzzadan geri çəkilməsinə səbəb olsun. Eyni zamanda, biz ərəb ölkələrindən və beynəlxalq ictimaiyyətdən sionistlərin Qəzzada törətdiyi cinayətlərin dayandırılması üçün ciddi təzyiq göstərmələrini tələb edirik. Danışıqların bərpası üçün vasitəçilərlə əməkdaşlığımız və əlaqələrimiz davam edir və biz danışıqların dağılmasına imkan vermək istəmirik.
O vurğulayıb: Heç kim istəmir ki, danışıqlar uğursuzluğa düçar olsun və biz dözüm və məsləhətləşməyə sadiq qalmışıq ki, xalqımızın arzularını reallaşdıracaq yaxşı bir razılaşmaya çataq. Bir neçə məsələdə uğurlar əldə etmişik. Həmçinin, Həmas daim digər fələstinli qruplarla koordinasiya və məsləhətləşmələr aparır ki, Qəzza xalqının hüquqlarını təmin edəcək vahid milli mövqe formalaşdıraq.
Adı çəkilən Həmas lideri əlavə edib: Biz xalqımızın Qəzzada yaşadığı əzab, ağrı və dağıntının miqyasından tam şəkildə xəbərdarıq və elə bir razılaşma üzərində çalışırıq ki, bu, müharibənin sonlanmasına və atəşkəsdən 60 gün sonra sionistlərin geri çəkilməsinə gətirib çıxarsın. İşğalçılar Qəzzanı siyasi xəritədən silmək və fələstinli qrupları məhv etmək niyyətindədirlər, lakin bu tamamilə qəbuledilməzdir və biz heç vaxt heç bir fələstinli qrupun siyasi müstəvidən silinməsinə icazə verməyəcəyik.
Fələstin xalqının hüquqlarını təmin edəcək bir razılaşma axtarırıq
Qazi Həmid çıxışının davamında Qəzza xalqına müraciətlə bildirib: “Biz Həmas olaraq digər fələstinli qruplarla daim əlaqədəyik, əməkdaşlıq edir və məsləhətləşmələr aparırıq ki, bu ağrılı müharibədə sizin bütün hüquqlarınızı təmin edəcək milli bir formulu taparaq razılaşmaya çataq. Biz xalqımızın Qəzzada çəkdiyi ağrını, əziyyəti, zülmü və dağıntını tam şəkildə anlayırıq və sürətli bir razılaşmanı imzalamaq üçün böyük təzyiq altında olduğumuzu bilirik, lakin biz tam səylə və qətiyyətlə çalışmışıq ki, Qəzza xalqına və onların hüquqlarına hörmət edən, onların atəşkəs, humanitar yardımın daxil olması və ləyaqətli bir həyatla bağlı istəklərini qarşılayan bir razılaşmaya nail olaq.”
Qazi Həmid bildirib ki, Həmas əhəmiyyətli dərəcədə şərtləri yaxşılaşdırmağa müvəffəq olub və razılaşmaya çatmaq üçün real və məntiqli bir yanaşma təqdim edib ki, bu da xalqımızın hüquqlarını təmin etsin. Aydındır ki, Həmas heç vaxt razılaşmaya çatmağa maneə olmayıb və danışıqların dağılmasının qarşısını almaq üçün çalışır.
Qafqaz Times xəbər verir ki, ötən cümə axşamı günün sonunadək ABŞ-ın qiymətləndirmələri göstərib ki, Həmas-ın cavabı atəşkəs razılaşmasına çatmaqda əsl maneə deyil; əksinə, bu cavab danışıqların irəlilədilməsi üçün istinad oluna biləcək elementlərə malikdir. Bu əsasda ABŞ-ın xüsusi nümayəndəsi Stiv Vitkof misirli və qətərli vasitəçilərlə Dohada planlaşdırılan yeni danışıqlar raunduna hazırlıq məqsədilə əlaqə saxlayıb.
Lakin buna baxmayaraq, ABŞ Prezidenti Donald Tramp, bu ölkənin xarici işlər naziri Marko Rubio və işğalçı rejimin baş naziri Benyamin Netanyahu arasında baş tutan üçtərəfli telefon danışığından və ardınca amerikalı və israilli heyətlərin Dohadakı danışıqlardan qəfil çıxmasından sonra danışıqların atmosferində kəskin dəyişiklik baş verib və bu, təzyiq mesajı kimi qəbul olunub. Bəzi müşahidəçilər bunu danışıqların uğursuzluğu kimi qiymətləndirir, lakin bəziləri hesab edir ki, bu təzyiqin məqsədi danışıqların balansını İsrailin xeyrinə dəyişməkdir.
Digər tərəfdən, Qətərin “əl-Ərəbi əl-Cədid” veb saytı misirli mənbələrə və atəşkəs danışıqlarında iştirak edən bəzi Həmas liderlərinə istinadla bildirib ki, atəşkəs danışıqları bazar ertəsi günü yenidən başlayacaq və misirli və qətərli vasitəçilər Dohada Həmas rəhbərliyini və bu hərəkatın danışıqlar heyətini məlumatlandırıblar ki, İsrail və ABŞ heyətlərinin çıxışı və Stiv Vitkofun mənfi açıqlamalarına baxmayaraq, danışıqlar dayandırılmayıb.
Bu sahədə misirli bir mənbə bildirib ki, vasitəçilər Həmas rəhbərliyini və danışıqlar heyətini məlumatlandırıblar ki, danışıqlar hələ də dayandırılmayıb və israilli və amerikalı tərəflər misirli və qətərli vasitəçilərə bildiriblər ki, danışıqlar heyətləri gələn bazar ertəsi danışıqların bərpası üçün Dohaya qayıdacaqlar.
Danışıqların gedişatı ilə tanış olan Həmas liderlərindən biri deyib: “Baş verənlər İsrail və ABŞ-ın əvvəlcədən planlaşdırılmış niyyətidir ki, danışıqlar prosesini zəiflətsinlər və razılaşmaya çatılmadığı təqdirdə məsuliyyəti Həmas-ın üzərinə qoysunlar – bu isə yalnız Təl-Əvivin maraqlarına xidmət edir.”