Həmasın yüksək rütbəli üzvü Doha və Qahirədə danışıqların hələ də davam etdiyini, bir neçə günlük atəşkəs müqabilində ölü və ya diri heç bir israilli məhbusu təhvil verməyəcəklərini vurğulayıb.
Qafqaztimesin xarici medialara istinadən verdiyi məlumata əsasən, Həmud Mərdavi bu gün (26 aprel) deyib: Doha və Qahirədə danışıqlar dayanmayıb. Vasitəçilər və ABŞ hökuməti indi bizim mövqeyimizdən xəbərdardır. Bizim mövqeyimiz mərhələli olmayan hərtərəfli razılaşmadır.
O, əlavə edib: Biz hərbi əməliyyatların dayandırılmasını, işğalçıların tamamilə çıxarılmasını, insanlara yardımın göstərilməsini və Qəzza zolağının yenidən qurulmasını əhatə edən hərtərəfli razılaşmaya nail olmaq üçün kifayət qədər çeviklik nümayiş etdirəcəyik. Bu dəfə biz müharibənin tam dayandırılması üçün zəmanət almaqda israrlıyıq. İşğalçı rejim hər hansı qismən və mərhələli razılaşmadan sonra müharibəyə qayıda bilər. Amma hərtərəfli razılaşmadan sonra və beynəlxalq təminatlar mövcud olduqdan sonra bunu edə bilməyəcək. Biz hər bir müqavilədə zəmanət almağı tələb edəcəyik.