ABŞ-ın İllinoys ştatının Çikaqo şəhərində baş verən atışmada 4 nəfər ölüb, 14 nəfər isə yaralanıb. Bu zaman bəzi yerli media orqanları hadisədən bir neçə saat sonra daha bir kor atışmanın baş verdiyini xəbər veriblər.
Qafqaz Times -ın məlumatına görə, ABŞ-ın yerli polisi bildirib ki, Çikaqo şəhərinin “Şimal çayı” (River North) məhəlləsində avtomobildən açılan atəş nəticəsində 4 nəfər ölüb, 14 nəfər yaralanıb.
Çikaqo Polis İdarəsi bəyanatında bildirib ki, atışma çərşənbə gecəsi saat 23 radələrində baş verib. Qara rəngli avtomobil kütlənin yanından keçərək çöldə dayanan insanlara atəş açıb.
Polisin sözlərinə görə, avtomobil dərhal hadisə yerindən uzaqlaşıb və bu işlə bağlı hələ heç kim saxlanılmayıb.
Yerli “Fox 32 Chicago” mediasının məlumatına görə, cümə axşamı yerli vaxtla səhər saatlarında Çikaqonun cənubundakı “Qolden Qeyt” məhəlləsində baş verən digər atışmada 4 nəfər yaralanıb.
Qurbanlar, o cümlədən bir qadın və üç kişi, səhər saat 3:17 radələrində küçədə dayanarkən atışma baş verib və kişilərdən ikisi ağır yaralanıb. Bu atışma ilk hadisədən cəmi bir neçə saat sonra baş verib.