Boston Consulting Group-un (BCG) iki baş tərəfdaşı – risk üzrə baş direktor Adam Farber və sosial təsir proqramının rəhbəri Rich Hutchinson – Qəzzada ABŞ və İsrailin dəstəklədiyi “Gaza Humanitarian Foundation” (GHF) layihəsində iştiraka görə yaranmış qalmaqal fonunda vəzifələrindən istefa veriblər. Onlar tərəfdaş olaraq şirkətdə qalacaqlar.
Financial Times ötən həftə xəbər vermişdi ki, BCG əməkdaşları fələstinlilərin Qəzzadan “köçürülməsi” ilə bağlı xərc modelləri hazırlayıb və GHF-nin yaradılması üçün milyonlarla dollarlıq müqaviləyə qoşulublar. BMT və yardım təşkilatları bu fondun planlarının humanitar prinsiplərə uyğun olmadığını və fələstinlilərin zorla köçürülməsini təşviq etdiyini bildirib.
Qəzzadakı səhiyyə rəsmiləri də GHF-nin yardım mərkəzləri fəaliyyətə başladıqdan sonra yardım axtaran 700-dən çox fələstinlinin öldürüldüyünü açıqlayıb.
Wall Street Journal yazır ki, bu qalmaqal BCG-nin bəzi uzunmüddətli müştərilərinin narazılığına səbəb olub və həm hazırkı əməkdaşlar, həm də məzunlar bu əməkdaşlığı tənqid ediblər. BCG, layihə ilə bağlı icazəsiz fəaliyyət göstərən iki tərəfdaşı – Matt Schlueter və Ryan Ordway-i artıq iyun ayında işdən çıxarıb.
Şirkət bildirib ki, məsələ fərdi pozuntu və nəzarət boşluğu nəticəsində baş verib və müstəqil araşdırma aparıldıqdan dərhal sonra layihə dayandırılıb.
BCG-nin bu layihəyə cəlb olunması, keçmiş CIA əməkdaşı və şirkətin keçmiş məsləhətçisi Fil Reilly-nin rəhbərlik etdiyi Orbis şirkəti vasitəsilə baş verib. Reilly hazırda GHF-nin Qəzzadakı yardım mərkəzlərinin təhlükəsizliyinə cavabdeh özəl “Safe Reach Solutions” şirkətini idarə edir.