Bağdadın cümə imamı İranın nüvə proqramının daxili bir məsələ olmasına baxmayaraq İraqın siyasi-təhlükəsizlik sektoruna müsbət təsiri olacağını deyib.
Qafqaztimesin xarici medialara istinadən verdiyi məlumata əsasən, Ayətullah Seyid Yasin Əl Musəvi ötən cümə namazı (25 aprel) xütbəsində deyib: İranın nüvə proqramı mahiyyət etibarı ilə təkcə İrana aid olan daxili məsələdir və heç bir xarici tərəfin ona müdaxilə etmək hüququ yoxdur. Bununla belə, İraq coğrafi və siyasi yaxınlığına görə bu işdən çox təsirlənir, ona görə də İrandakı istənilən sabitlik və ya gərginlik təbii olaraq İraqa da sirayət edir.
Əl Musəvi davam edib: ABŞ İraqdakı vəziyyətin sabitliyini İranla anlaşmanın nəticəsi ilə əlaqələndirib.
O, həmçinin Omanda Vaşinqton və Tehran arasında danışıqların başlamasından sonra ABŞ-ın İraqa təzyiqinin azaldığını bildirərək, bunu İraq üçün müsbət hal hesab edib və İraq rəsmilərini İranın nüvə müzakirələrini diqqətlə izləməyə çağırıb.