“Financial Times”ın məlumatına görə, Avropanın ilkin kəşfiyyat məlumatları göstərir ki, İrana məxsus silah səviyyəsinə yaxın 408 kiloqramlıq zənginləşdirilmiş uran ehtiyatı ABŞ-ın hücumlarından salamat çıxıb. Bu isə Trampın İranın nüvə proqramının tamamilə məhv edildiyi iddiası ilə ziddiyyət təşkil edir.
Məlumata görə, bu materiallar hücumdan əvvəl əsas obyektlərdən çıxarılıb və bu da İranın qalan nüvə imkanları ilə bağlı yeni narahatlıqlar yaradıb. Avropa İttifaqı rəsmiləri bildirirlər ki, zənginləşdirilmiş uran ehtiyatı hücum zamanı yalnız Fordo obyektində toplanmamış, müxtəlif yerlərdə yerləşdirilmişdi ki, bu da onu hədəfə almağı çətinləşdirirdi.
CNN, Washington Post (Demokrat Partiyasına yaxın media) və Avropa mənbələri ABŞ-ın Fordoda uğurlu əməliyyat keçirmədiyini düşünürlər. Atom Enerjisi üzrə Beynəlxalq Agentliyin rəhbəri Rafael Qrossi də müəyyən ziyanların olduğunu, lakin obyektin tam məhv edilməsinin doğru olmadığını bildirib.
Tramp isə Fordonun tamamilə dağıdıldığını iddia edir.
Görünür, ABŞ mediasında əməliyyat və Fordoya dəyən ziyanın miqyası barədə yayılan məlumatların mühüm hissəsi Demokrat və Respublikaçı dairələr arasındakı siyasi mübarizəyə xidmət edir və bu xəbərlərə tam etibar etmək olmaz.
Hesab edirəm ki, cənab Əraqçinin açıqlamalarını əsas götürmək daha düzgün olar; o bildirib ki, İranın nüvə proqramına ciddi ziyan dəyib.