Yəmən Silahlı Qüvvələri bəyanat yayaraq xüsusi bir raket əməliyyatı çərçivəsində işğal altındakı Yafa bölgəsində yerləşən Lodd (Ben Qurion) hava limanını “Zülfəqar” ballistik raketi ilə hədəfə aldıqlarını bildirib.
Qafqaz Times-ın məlumatına görə, Yəmən Silahlı Qüvvələrinin sözçüsü Yahya Səri yayımladığı bəyanatda bildirib ki, Yəmən ordusu xüsusi bir raket əməliyyatı həyata keçirərək Yafadakı işğal olunmuş Lodd (Ben Qurion) hava limanına “Zülfəqar” ballistik raketi ilə zərbə endirib. Yəmənlilərin bildirdiyinə görə, hücum uğurla həyata keçirilib, hava limanının fəaliyyəti dayanıb və sionist sakinlər kütləvi şəkildə sığınacaqlara qaçıblar.
Əlavə olaraq, Yəmən ordusunun pilotsuz uçuş aparatları bölməsi dörd dron vasitəsilə üç hərbi əməliyyat həyata keçirib. İki dron Naqab bölgəsindəki hərbi mövqeləri, digər iki dron isə Lodd hava limanı və “Ümm ər-Rəşraş” (Eylat) limanını hədəfə alıb. Bəyanata görə, bu əməliyyatların hamısı dəqiq şəkildə müəyyən edilmiş hədəfləri vurub və uğurla icra olunub.
Yəmən ordusu bəyan edib ki, Fələstin xalqına qarşı dini, mənəvi və insani məsuliyyət daşıyır və əgər sionist rejimin Qəzzadakı cinayətləri davam edərsə, hərbi əməliyyatların miqyası genişləndiriləcək.
Bəyanatda həmçinin qeyd olunur ki, Yəmən ordusu İsrailin Qırmızı dəniz və Ərəb dənizindəki hərəkətlərinin qarşısını almaqda davam edir və işğal olunmuş ərazilərdəki limanlarla əməkdaşlıq edən bütün şirkətlərə bir daha xəbərdarlıq edilir: gəmiləri Yəmən qüvvələrinin əlçatan olduğu hər yerdə hədəfə alınacaq – bu, həmin gəmilərin son təyinatından asılı olmayaraq həyata keçiriləcək.
Yəmən Silahlı Qüvvələri vurğulayıb ki, əməliyyatlar Qəzzaya edilən hücumlar tamamilə dayandırılana və bu bölgəyə tətbiq edilən mühasirə sona çatana qədər davam edəcək.