Türkiyənin Şırnak vilayətinin Cizre rayonunda iki ailə üzvləri arasında küçədə dava baş verib.
Daha sonra dava xəstəxananın təcili yardım şöbəsində davam edib və şöbə “döyüş meydanına” çevrilib.
İki ailənin üzvləri arasında daş və dəyənəklə başlayan dava Cizre Dövlət Xəstəxanasının təcili yardım şöbəsinin koridorlarına keçib. Dava iki şəxs arasında baş verib, daha sonra münaqişəyə ailələr qarışıb. Əllərinə keçəni bir-birilərinə atmağa və yaralamağa başlayıblar.
Hadisə yerinə çevik reaksiya qüvvələri cəlb edilib və vəziyyət nəzarətə götürülüb. Yaralananlar xəstəxanaya yerləşdiriliblər.
Xəstəxanada dava nəticəsində təcili yardım şöbəsindəki kompüter və texniki avadanlıqlar da sıradan çıxıb. Bir çox vətəndaş müayinə olunmadan geri qayıdıb.
Hadisə ilə bağlı araşdırmalara başlanılıb.