İsrail ötən gecə Suveyda ətrafında yeni hava hücumları həyata keçirib. Hədəf, Dürzi silahlı qruplarla döyüşən bədəvi milislər olub.
Cənubdakı Suveyda şəhərinin ətrafında, hökumətyönlü bədəvi tayfaları ilə Dürzi silahlı qrupları arasında daha əvvəl əldə olunan kövrək atəşkəsə baxmayaraq, toqquşmalar yenidən başlayıb.
Yerli mənbələrin verdiyi məlumata görə, döyüşlər Suveyda şəhər mərkəzindən təxminən altı kilometr aralıda gedir.
18 iyul tarixində Suriya Daxili İşlər Nazirliyi “Levant24” xəbər portalına verdiyi açıqlamada, Dəməşq qüvvələrinin Suveydaya yenidən yerləşdiriləcəyinə dair yayılan xəbərləri təkzib edib:
“Bəzi media orqanları və agentliklər Daxili Təhlükəsizlik Qüvvələrinin Əl-Suveyda vilayətinə daxil olduğu barədə qeyri-dəqiq məlumatlar yayıb. Bu məsələ ilə bağlı heç bir rəsmi bəyanat verilməyib və yayılan məlumatların düzgünlüyünü qəti şəkildə inkar edirik.”
Nazirlik əlavə edib: “Mətbuat orqanları yayılan etibarsız informasiyalara görə məsuliyyət daşıyır. Daxili İşlər Nazirliyinin qüvvələri hazırda normal hazırlıq vəziyyətindədir və vilayətdə heç bir hərəkətlilik və ya yerləşdirmə yoxdur.”
Bununla belə, ivritdilli media bildirir ki, İsrail Suveydadakı gərgin vəziyyətə görə məhdud sayda Suriya təhlükəsizlik qüvvəsinin əraziyə girişinə “icazə verib.”
Reuters isə Suriya Daxili İşlər Nazirliyinin sözçüsünə istinadən yazıb ki, Suriya hərbi qüvvələri Suveydaya yenidən daxil olmağa hazırlaşır.
Bu arada İsrailin xarici işlər naziri Gideon Saar bəyan edib ki, Suveydadakı dürzilərə humanitar yardım üçün 2 milyon yeni İsrail şekeli (təxminən 540 min ABŞ dolları) ayırmağı tapşırıb. Tel-Əviv bu yardımın İsrailin son hava hücumlarında “qorumağa çalışdığı” dürzilərə çatdırılacağını iddia edir.
Nazir yardımın hansı yolla göndəriləcəyini açıqlamasa da, onun “hədəflənmiş şəkildə” çatdırılacağını deyib. XİN-dən bildirilib ki, yardım paketlərinə qida, dərman və ilkin tibbi yardım ləvazimatları daxil olacaq.
İsrail gecə saatlarında Suriyanın Suveyda ətrafındakı bədəvi döyüşçülərə qarşı hava hücumlarını yenidən başladıb.
“Yediot Ahronot” qəzetinin məlumatına görə, İsrail çərşənbə axşamından bəri Suriyada 200 hava zərbəsi endirib, bunların əksəriyyəti Suveyda ilə əlaqəsi olmayan hədəflərə qarşı olub.
Çərşənbə günü İsrail Suriyanın Müdafiə Nazirliyinin binasına və Dəməşqdə prezident sarayının yaxınlığındakı əraziyə ağır hava zərbələri endirib. Rəsmi bəyanata görə, məqsəd “Dürzi azlığını qorumaq” olub. Bu hücumlar nəticəsində onlarla insan həlak olub. İsrailin hücumları axşam saatlarına qədər davam edib.
Bu zərbələr eyni zamanda Suveyda şəhərində Suriya hökumət qüvvələri ilə Dürzi döyüşçüləri arasında şiddətli döyüşlərin getdiyi vaxt baş verib. Çərşənbə axşamı axşam saatlarında atəşkəs razılaşması elan olunub və döyüşlər dayandırılıb. Razılaşmaya əsasən, əsasən Dürzi qruplarının nəzarətində olan Suveyda tam şəkildə Suriya dövlətinin tərkibinə inteqrasiya olunacaq.
Dəməşq bu həftənin əvvəlində açıqlama verərək Suveydaya qanun pozan silahlı qrupları çıxarmaq və asayişi bərpa etmək üçün ordu yerləşdirdiyini bildirmişdi. Lakin hökumət qüvvələrinin bədəvi milislərlə birlikdə Dürzilərə qarşı hücumlarda iştirak etdiyi məlum olub.
Suriya Müdafiə Nazirliyi ilə əlaqəli döyüşçülərin onlarla silahsız mülki şəxsi edam etdiyi bildirilir.
Atəşkəs razılaşmasına əsasən, Suriya əsgərləri çərşənbə axşamı axşam saatlarında Suveydadan çıxıblar. Dörd gün davam edən şiddətli döyüşlərdə 370-dən çox insan həlak olub. Toqquşmalar bazar günü bədəvi milislərin bir gənc dürzi oğlanı qarət edib və vəhşicəsinə döydükdən sonra başlamışdı.