QafqazTimes xəbər verir ki, Əsədullah Harun Gül beş gün əvvəl Quantanamodan azad edilən iki Əfqanıstan vətəndaşından biridir.
Taliban sözçüsü Zəbihullah Mücahid ötən şənbə Harunun Quantanamodan azad edildiyini elan edərək, onun Taliban və ABŞ arasında aparılan danışıqlardan sonra azad edildiyini bildirib.
Mücahidin sözlərinə görə, Qətər hökuməti bu məsələdə vasitəçi rolunu oynayıb. O, həmçinin vurğulayıb ki, xaricdə saxlanılan digər əfqan məhbusların da azad edilməsi üçün səylər davam etdirilir.
Əfqan mediasına verdiyi müsahibədə Əsədullah Harun Quantanamodakı vəziyyətinin təfərrüatları barədə danışıb. O, 15 ildir heç bir ittiham irəli sürülmədən Quantanamo həbsxanasında saxlandığını və bu müddət ərzində ABŞ hərbçiləri tərəfindən işgəncələrə məruz qaldığını bildirib.
Keçmiş Quantanamo məhbusu TOLOnews-a deyib: “Mən hal-hazırda davamlı işgəncələr səbəbindən psixoloji problemlər yaşayıram.”
41 yaşlı Əsədullah Harun 15 il əvvəl 2007-ci ildə Nanqarhar əyalətində ABŞ qüvvələri tərəfindən həbs edilərək Quantanamo həbsxanasına göndərilib. O, 15 il həbsdə olduğu müddətdə vəkil tapmaq üçün 900-dən çox məktub yazdığını bildirib.
O, həmçinin qeyd edib: “Quantanamo hərbi düşərgə idi. Bizim heç bir qanuni hüququmuz yox idi və mənim 15 ildir vəkilim olmayıb.”
Kabil İqtisadiyyat Məktəbinin məzunu olan Harun əlavə edib: “Həyatımın 15 ilini itirdim, amma heç vaxt ABŞ tərəfindən hansı cinayətə görə həbs olunduğumu anlamadım.”