Nəhəng kolbasa şirkətinin sahibi, rusiyalı iş adamı Pavel Antov müəmmalı şəkildə həyatını itirib.
Onun Hindistanda lüks hotelin pəncərəsindən yıxılaraq dünyasını dəyişdiyi bildirilib.
Məlumata görə, Pavel Antov 66 yaşını qeyd etmək üçün dostları ilə getdiyi Hindistanın Rayaqada bölgəsində lüks hoteldə qalıb. Lakin müəmmalı şəkildə hotelin 3-cü mərtəbədəki pəncərəsindən həyətdəki hovuza yıxılıb. Ağır xəsarətlər alan Antov aparıldığı xəstəxanada dünyasını dəyişib.
Rusiyanın Vladimir vilayətində yerli qanunvericilik orqanının deputatı, ölkənin ən zəngin siyasətçilərindən biri olan Antovla birlikdə Hindistana yollanan dostlarından birinin ötən həftə orada infarkt nəticəsində ölməsi suallar yaradıb.
“Forbes Russian”ın məlumatına görə, evli və bir uşaq atası olan Antovun illik gəliri 157 milyon dollar təşkil edirdi.
Son aylarda bir çox rusiyalı biznesmen qeyri-aşkar səbəblərdən həyatını itirib. Sentyabrda Rusiyanın enerji nəhəngi “LUKOYL”un baş meneceri Ravil Maqanov xəstəxananın pəncərəsindən yıxılaraq ölüb.
Müəmmalı ölümlərlə bağlı sirr pərdəsini açmaq mümkün olmasa da, Ukrayna müharibəsindən sonra Qərbin tətbiq etdiyi sanksiyalara görə Rusiyada oliqarxlar arasında böyük rəqabətin olduğu iddia edilir.