17 iyul tarixində İsrail ordusunun həyata keçirdiyi hücum Qəzzada yerləşən və bölgədəki yeganə Katolik kilsəsi olan Müqəddəs Ailə Kilsəsinin kompleksini hədəfə alıb. Hücum nəticəsində üç nəfər həlak olub, azı 10 nəfər yaralanıb. Yaralananlar arasında bu kilsənin keşişi, argentinalı rahib Qabriel Romanelli də var.
Kilsə həmin vaxt həm xristian, həm də müsəlmanlardan ibarət yerindən edilmiş insanlar – o cümlədən əlilliyi olan uşaqlar – üçün sığınacaq kimi istifadə olunurdu.
Qüdsün Latın Patriarxlığı hadisə ilə bağlı yayımladığı bəyanatda hücumu təsdiqləyərək, “bu səhər Müqəddəs Ailə Kilsəsi Kompleksinə İsrail ordusu tərəfindən açıq şəkildə zərbə endirilib” ifadəsini işlədib.
“Biz həlak olanların ruhuna dua edir və bu vəhşi müharibənin sona çatmasını diləyirik. Günahsız mülki şəxslərin hədəfə alınmasını heç nə əsaslandıra bilməz,” – bəyanatda qeyd olunub.
Hadisə şahidlərinin sözlərinə görə, hücuma İsrail tanklarından atılan mərmilər səbəb olub.
Rahib Romanelli, müharibənin ilk aylarında mərhum Papa Fransiskin hər axşam zəng etdiyi keşiş idi. Hücum zamanı o da yaralanıb. Reuters-in yaydığı görüntülərdə onun sol ayağı sarğılı halda müstəqil şəkildə yeridiyi görünür. Papa Fransisk Romanelliyə ilk dəfə 2023-cü il oktyabrın 9-da, yəni İsrailin Qəzzaya qarşı müharibəyə başlamasından cəmi iki gün sonra zəng etmişdi. Bu, həmrəylik və mənəvi dəstək niyyəti daşıyırdı.
Vatikan hadisə ilə bağlı Papa XIV Leonun başsağlığı mesajını yayımlayıb. Mesajda o bildirib ki, “hərbi hücum nəticəsində insan tələfatı və yaralanmalardan dərin kədər duyur” və dərhal atəşkəsə çağırışını bir daha təkrarlayıb.
Yaralılar Əl-Əhli Ərəb Xəstəxanasına çatdırılıb. Xəstəxananın müvəqqəti direktoru Dr. Fadıl Naeim bildirib ki, azı iki yaralının vəziyyəti ağırdır. Yaralananlar arasında əlil uşaq, iki qadın və bir yaşlı insan da var.
İsrail ordusu hadisə ilə bağlı “araşdırma apardığını” bildirib.
Qəzzanın digər bölgələrində də İsrailin hava zərbələri nəticəsində onlarla fələstinli ölüb və ya yaralanıb. Cümə axşamı günü Qəzza şəhərinin cənub-şərqində yerləşən Əz-Zeytun məhəlləsində, İmam Əş-Şafei məktəbinin yaxınlığında yerləşən bir evə endirilən hava zərbəsi nəticəsində dörd nəfər həlak olub.
İsrail Qəzza mühasirəyə alındıqdan və genosid xarakterli müharibəyə başladıqdan bəri daim dini məkanları – həm məscidləri, həm də kilsələri – hədəfə alıb.
Bu ayın əvvəlində işğal altındakı İordan çayının qərb sahilində yerləşən Taybeh şəhərində xristian dini irsinə qarşı daha bir hücum baş verib. 7 iyulda israilli məskunlaşanlar şəhərin qəbiristanlığı və tarixi Müqəddəs Georgi (Əl-Xadr) Kilsəsinin yaxınlığında yanğın törədiblər. Bu, eramızın V əsrinə aid olan və Fələstindəki ən qədim dini abidələrdən biri sayılır.
Üç yerli rahibin imzaladığı ortaq bəyanatda bu hücum sərt şəkildə pislənilib. Bildirilib ki, bu cür hücumlar “əhalinin ləyaqətini və müqəddəs torpaqların toxunulmazlığını hədəf almaqdadır.” Taybeh İordan çayının qərb sahilində yalnız xristianlardan ibarət olan sonuncu şəhərdir və İsa Məsihin çarmıxa çəkilməzdən əvvəl burada sığınacaq tapdığına inanılır.
Rahiblər əlavə ediblər ki, “bu torpaqda mövcudluğumuzu təhdid edən bu amansız hücumlar qarşısında susmaq mümkün deyil,” və vurğulayıblar ki, Taybehin “tamamilə xristian əhalisi bölgədə bənzərsiz bir varlığı, Məsih dövrünə qədər gedib çıxan canlı bir şahidliyi təmsil edir.”