İran MAQATE rəhbəri Rafael Qrossiyə qarşı hüquqi addımlar ata biləcəyinə işarə edib, o, ölkəyə daxil olmaqdan məhrum edilib
İran ABŞ və İsrailin ölkənin nüvə obyektlərinə hücumuna zəmin yaratmaqda ittiham etdiyi Beynəlxalq Atom Enerjisi Agentliyi (MAQATE) ilə əməkdaşlığını rəsmi olaraq dayandırıb.
Tasnim xəbər agentliyinin 2 iyul tarixli məlumatına görə, İran prezidenti Məsud Pezeşkiyan “bütün inzibati qurumlara agentliklə əməkdaşlığın dayandırılması barədə parlamentin göstərişinin icrasını” tapşırıb.
İran parlamenti 25 iyunda, İsrailin İrana qarşı 12 günlük müharibəsinin başa çatmasından bir gün sonra BMT-nin nüvə nəzarət qurumu ilə əməkdaşlığı dayandırmağa səs verib.
Bu addım İranın Ali Milli Təhlükəsizlik Şurası və Nəzarət Şurası tərəfindən təsdiqlənib.
Pezeşkiyanın göstərişi İranın xarici işlər naziri Abbas Əraqçinin CBS-ə müsahibəsində Fordo nüvə obyektində ciddi ziyanı etiraf etməsi ilə eyni vaxta təsadüf edib.
“Fordoda baş verənlərin dəqiq detallarını heç kim bilmir. Bununla belə, indiyə qədər məlum olan odur ki, obyektlər ciddi və genişmiqyaslı zərər görüb,” – deyə Əraqçi bildirib.
“O, əlavə edib ki, İran İslam Respublikasının Atom Enerjisi Təşkilatı hazırda qiymətləndirmə aparır və hesabatı hökumətə təqdim edəcək.”
Bir gün əvvəl İran hökumətinin sözçüsü Fatimə Mühacirani mətbuat konfransında bildirib ki, ölkənin nüvə obyektləri İsrail və ABŞ hücumlarından “ciddi zərər” alıb.
ABŞ prezidenti Donald Tramp isə Vaşinqtonun hücumunun İranın nüvə obyektlərini “tamamilə məhv etdiyini” iddia edib.
Lakin sızdırılmış ABŞ və Avropa kəşfiyyat qiymətləndirmələrinə görə, İranın zənginləşdirilmiş uran ehtiyatı sağ qala bilib və ölkənin nüvə proqramı yalnız müvəqqəti olaraq geriyə atılıb.
İsrailin ABŞ-ın dəstəyi ilə İrana qarşı başladığı kampaniya MAQATE idarə heyətinin Tehranın Qeyri-Yayılma Müqaviləsi (NPT) üzrə öhdəliklərinə əməl etməməsini ittiham edən qətnamə qəbul etməsindən cəmi bir gün sonra start götürüb. Qətnamə, may ayının sonunda MAQATE-nin İranın onilliklər əvvəl BMT-yə bəyan edilməmiş materiallardan istifadə edərək üç yerdə gizli nüvə fəaliyyəti apardığını iddia edən hesabatına əsaslanıb.
İran Xarici İşlər Nazirliyi ötən ay bildirib ki, MAQATE hesabatı 13 iyunda İslam Respublikasına qarşı İsrail müharibəsinin başlanmasına zəmin yaradıb.
MAQATE rəhbəri Rafael Qrossi bu həftənin əvvəlində bildirib ki, İran bir neçə ay ərzində uranı zənginləşdirməyə başlaya bilər.
İran yaxınlarda Qrossinin zədələnmiş nüvə obyektlərini ziyarət etmək istəyini rədd edib.
Əraqçi bu həftənin əvvəlində bəyan edib: “Qrossinin təhlükəsizlik tədbirləri bəhanəsi ilə bombalanmış obyektləri ziyarət etməkdə israrı mənasızdır və hətta bədniyyətli məqsəd güdə bilər.” İranın Atom Enerjisi Təşkilatı (AEOI) Tehranın Qrossiyə qarşı hüquqi addımlar ata biləcəyini bildirib.
MAQATE rəhbərinin ölkəyə daxil olması qadağan edilib.