BMT-nin Nüvə Enerjisi üzrə Beynəlxalq Agentliyinin (MAQATE) 35 üzvdən ibarət İdarə Heyəti, demək olar ki, 20 il sonra ilk dəfə olaraq İranı nüvə silahlarının yayılmaması ilə bağlı öhdəliklərini pozmaqda təqsirli bilib. Bu qərar İranın BMT Təhlükəsizlik Şurasına göndərilməsi üçün hüquqi əsas yarada bilər.
Səsvermədən sonra İran yeni uran zənginləşdirmə obyektinin yaradılacağını elan edib. Rəsmi açıqlamada obyektin “təhlükəsiz bir yerdə” yerləşəcəyi və “başqa tədbirlərin də planlaşdırıldığı” bildirilib.
İranın Xarici İşlər Nazirliyi və Atom Enerjisi Təşkilatının yaydığı birgə bəyanatda qeyd olunub: “İslam Respublikası bu siyasi qətnaməyə cavab verməkdən başqa çıxış yolu görmür.”