8 iyun 2023-cü il tarixində Azərbaycan Respublikasının xarici işlər naziri Ceyhun Bayramov ilə İran İslam Respublikasının xarici işlər naziri Hüseyn Əmir Abdullahian arasında telefon danışığı baş tutub.
Təsnim İnformasiya Agentliyinin məlumatına görə telefon danışığı zamanı, Azərbaycanla İran arasında münasibətlərin cari vəziyyəti, bəzi mövcud problemlər və onların həlli məsələləri müzakirə edilib.
Qeyd edilən istiqamətlərdə iki ölkənin aidiyyəti qurumları arasında danışıqların və qarşılıqlı təmasların davam etdirilməsinə dair razılıq ifadə olunub.
Eyni zamanda tərəflər mətbuat və medianın düzgün idarə olunmasını konstruktiv hesab etmiş və iki ölkə arasında son məsələlərə nəzər salarkən anlaşılmazlıqların həlli və iki ölkənin qonşuluq əlaqələri və ümumi maraqlarına söykənən münasibətləri normallaşdırılmasının lazımlığı vurğulanıb.
Telefon danışığı zamanı həmçinin bir sıra regional məsələlər ətrafında fikir mübadiləsi aparılıb.