ABŞ-da bir apellyasiya məhkəməsi Tramp administrasiyasının venesuelalı miqrantların deportasiyasını sürətləndirmək üçün müharibə dövrü qanunundan istifadəsini qiymətləndirir.
Qafqaz Times -in məlumatına görə, ABŞ-da bir apellyasiya məhkəməsi bəzi venesuelalı miqrantların ABŞ ərazisindən deportasiya prosesinin müharibə dövrü qanunundan istifadə edilməklə sürətləndirilməsinə dair şifahi müdafiələri dinləyir.
Bu əsasa görə, Beşinci Regional Apellyasiya Məhkəməsi bu məsələni araşdırır: hökumət Texasda miqrantların saxlandığı bir mərkəzdə yerləşən bu venesuelalı miqrant qrupunu “Xarici Düşmənlər Qanunu”ndan istifadə etməklə ABŞ-dan deportasiya edə bilərmi?
Amerika Vətəndaş Azadlıqları İttifaqının vəkillərindən biri bildirib ki, bu qanun 1798-ci ilə aiddir və müharibə zamanı istifadə olunub, lakin hökumətin özü də etiraf edir ki, ABŞ Venesuela ilə hərbi müharibə vəziyyətində deyil.
Eyni zamanda hökumət bu miqrantların cinayətkar və terrorçu bir qruplaşmanın üzvləri olduğunu iddia edib, lakin Vətəndaş Azadlıqları İttifaqı bu iddianı rədd edərək bildirib ki, həmin şəxslərin çoxu hazırda sığınacaq müraciəti üçün qanuni prosesi keçir.
ABŞ Ali Məhkəməsi apreldə qərar verib ki, bu qanundan istifadə etməklə miqrantların deportasiyasına dair irəli sürülən etirazlar, miqrantların saxlandığı federal regional məhkəmələrdə araşdırılmalıdır.
Bununla belə, hakimlər 7 aprel və 16 may tarixlərində iki dəfə hökumətin “Xarici Düşmənlər Qanunu”ndan istifadə etməklə miqrantları deportasiya etmək cəhdlərinə məhdudiyyətlər tətbiq ediblər. Bu qanun adətən müharibə dövründə istifadə olunurdu. Həmçinin, cinayətkar və terrorçu qruplaşmaya üzv olmaqda ittiham edilən venesuelalı miqrantların miqrasiya rəsmiləri tərəfindən qanuni proses olmadan deportasiyası çətinləşib. Eyni zamanda, Ali Məhkəmə etiraf edib ki, hökumət miqrantların deportasiyası üçün digər immiqrasiya qanunlarından istifadə etməkdə azaddır.
Amerika Vətəndaş Azadlıqları İttifaqı bir neçə dəfə Ali Məhkəməyə miqrantların deportasiya işlərinə dərhal müdaxilə etmək üçün müraciət edib və xəbərdarlıq edib ki, miqrantlar “Xarici Düşmənlər Qanunu”ndan istifadə olunaraq, işləri məhkəmədə baxılmadan, birbaşa yüksək təhlükəsizlikli El Salvador həbsxanalarına göndərilirlər.
Trampın yanvar ayında Ağ Evə qayıdışından sonra, Ali Məhkəmədən miqrasiya ilə bağlı fövqəladə hallarda dəfələrlə müdaxilə etməsi istənilib. Son olaraq, Ali Məhkəmə Tramp administrasiyasına ABŞ-da yaşayan yüz minlərlə venesuelalı, kubalı, haitili və nikaraqualı miqranta verilmiş müvəqqəti humanitar qanuni statusu ləğv etməyə icazə verib.
Reuters xəbər verir ki, Bayden administrasiyası dövründə iki illik müvəqqəti qanuni status təcili humanitar ehtiyacları olan miqrantlara verilib və bu şəxslər ABŞ-da işləyə və yaşaya biliblər. Bayden administrasiyası bu müvəqqəti statusun verilməsini Meksika ilə sərhəddə qeyri-qanuni miqrasiya ilə mübarizə strategiyasının bir hissəsi hesab edirdi.
Ali Məhkəmə 19 may tarixində Tramp administrasiyasına Co Bayden tərəfindən yüz minlərlə venesuelalı miqranta verilmiş Müvəqqəti Qoruma Statusunu (TPS) ləğv etməyə də icazə verib.
Tramp ABŞ prezident seçkilərində qalib gəlməzdən əvvəl ABŞ-da genişmiqyaslı miqrant deportasiyasına başlayacağına söz vermişdi. Buna görə də 20 yanvardan, prezidentin andiçmə günü, bu siyasət həyata keçirilməyə başlanılıb. O, imzaladığı icra fərmanları ilə immiqrasiya zabitlərinə heç bir cinayət törətməmiş miqrantları da həbs etməyə imkan yaradıb, həmçinin Tramp digər federal qurumlardan immiqrasiya idarəsinə bu istiqamətdə kömək etmələrini tələb edib. Qeyri-qanuni miqrant axınının qarşısını almaq da Trampın əsas məqsədlərindən olub.
O, Ağ Evə daxil olduqdan bir neçə saat sonra qeyri-qanuni miqrantlara qarşı müxtəlif icra fərmanları və tədbirlər həyata keçirməyə başlayıb. Venesuela, Qvatemala, Kuba, Hindistan, Peru və Hondurasla razılaşmalar, qeyri-qanuni miqrantların hərbi təyyarələrlə bu ölkələrə köçürülməsi, miqrantların Quantanamo körfəzinə yerləşdirilməsi planı, ABŞ-Meksika sərhədində fövqəladə vəziyyət elan edilməsi və terrorçu və cinayətkar qruplara üzv olmaqda şübhəli bilinən miqrantların “Xarici Düşmənlər Qanunu”ndan istifadə etməklə deportasiyası bu tədbirlər sırasındadır.